मुख्यमन्त्री कप भलिबलमा रुकुमपूर्वलाई हराउँदै बाँके सेमिफाइनलमा
घाेराही, २२ चैत ।लदाङको घोराहीमा जारी मुख्यमन्त्री कप प्रदेश स्तरीय महिला भलिबल प्रतियोगिताकाे सेमिफाइनलमा बाँके प्रवेश गरेको छ ।
प्रदेश खेलकुद परिषद, लुम्बिनीको आयोजनामा जारी भएको प्रदेश स्तरीय प्रतियोगिता अन्तरगत शुक्रबार तेस्राे क्वाटरफाइनलमा रुकुमपूर्वलाई ३-२ काे सेटमा हराउँदै बाँके सेमिफाइनलमा पुगेकाे हाे ।
निकै प्रतिष्पर्धात्मक खेलमा बाँकले अन्तिम सेटमा नतिजा आफ्नाे पक्षमा पार्दै अन्तिम चारमा स्थान सुरक्षित गरेकाेे हाे । बाँकेले २-० सेटकाे अग्रता बनाएकाे अवस्थामा रुकुमपूर्वले त्यसपछिका दुई सेट जित्दै खेल बराबरीमा पुर्याएकाे थियाे । अन्तिम सेटमा बाँकेले नतिजा आफ्नाे पक्षमा पार्याे । बाँकेले २५-२२,२५-१८,२२-२५,२०-२५ र १५-११ काे सेटमा रुकुमपूर्वलाई हरायाे । जीतसँगै बाँकले सेमिफाइनलमा अब रुपन्देही र अर्घाखाँची बीचकाे खेलकाे विजेता टीमसँग खेल्नेछ ।
घोराही उपमहानगरपालिका वडा नम्बर १५ स्थित जिल्ला समन्वय समितिको सहिद मञ्चमा जारी प्रतियोगिताकाे क्वाटरफाईनलमा रोल्पा, रुकुमपूर्व, पाल्पा, अर्घाखाँची, बाँके, कपिलबस्तु, रुपन्देही दाङले खेलीरहेका छन् ।
यसैगरी, चाैथाे क्वाटरफाइनलमा रुपन्देही र अर्घाखाँची बीच खेल हुने आयाेजकले जनाएको छ।
लिगकम नकआउटको आधारमा खेलाइएको मुख्यमन्त्री कप प्रदेशस्तरीय महिला भलिबल प्रतियोगितामा प्रदेशका १२ वटै जिल्लाबाट महिला भलिबल खेलाडी दाङमा आएका प्रदेश खेलकुद परिषदका सदस्य सचिव तिरन गौतमले जानकारी दिनुभयो । प्रदेशमा दक्ष महिला खेलाडी उत्पादन गर्न र भलिबलको विकासका लागि प्रदेश स्तरीय प्रतियोगिता आयोजना गरिएको प्रदेश खेलकुद परिषद, लुम्बिनीले जनाएको छ ।
फाईनल खेल शनिबार हुने आयोजक प्रदेश खेलकुद परिषद लुम्बिनीले जनाएको छ ।
प्रतियोगिताको उपाधि जित्ने टीमले नगद एक लाख, मेडल, ट्रफी र प्रमाण–पत्र पुरस्कार पाउने छ भने उपविजेता टीमले नगद पैसट्टी हजार, मेडल, ट्रफी र प्रमाण–पत्र पुरस्कार पाउने आयोजक प्रदेश खेलकुद परिषदका सदस्य कैलाश रोका मगरले बताउनुभयो । यसैगरी, तृतीय पुरस्कार नगद पैतिस हजार, मेडल, ट्रफी र प्रमाण–पत्र र सान्त्वना हुने टीमले नगद पन्ध्र हजार प्रमाण–पत्र प्राप्त गर्ने उहाँले बताउनुभयो ।
प्रतियोगितामा सर्वोत्कृष्ट खेलाडीलाई नगद दश हजार, मेडल, ट्रफी र प्रमाण–पत्र प्रदान गरिनुका साथै ६ विधामा उत्कृष्ट हुने खेलाडीलाई पनि जनही पाँच हजार, मेडल, ट्रफी र प्रमाण–पत्र प्रदान गरिने उहाँले बताउनुभयो ।