Ad Area

मुख्यमन्त्री कप भलिबलमा अर्घाखाँचीलाई हराउँदै रुपन्देही सेमिफाइनलमा


घाेराही, २२ चैत । दाङको घोराहीमा जारी मुख्यमन्त्री कप प्रदेश स्तरीय महिला भलिबल प्रतियोगितामा रुपन्देही सेमिफाइनलमा प्रवेश गरेको छ ।

प्रदेश खेलकुलद परिषद, लुम्बिनीको आयोजनामा जारी भएको प्रदेश स्तरीय प्रतियोगिता अन्तरगत शुक्रबार भएको अन्तिम क्वाटरफाइनलमा अर्घाखाँचीलाई ३-० काे साेझाे सेटमा हराउँदै रुपन्देही सेमिफाइनलमा पुगेकाे हाे ।
घोराही उपमहानगरपालिका वडा नम्बर १५ स्थित जिल्ला समन्वय समितिको सहिद मञ्चमा जारी प्रतियोगितामा रुपन्देहीले २५-१६, २५-८ र २५-२० काे साेझाे सेटमा अर्घाखाँचीलाई हरायाे । जीतसँगै रुपन्देहीले सेमिफाइनलमा अब बाँकेसँगकाे भेट पक्का गरेकाे छ ।
याेसँगै प्रतियोगितामा सेमिफाइनल समिकरण पनि पूरा भएको छ । प्रतियोगिताकाे क्वाटरफाईनलमा रोल्पा, रुकुमपूर्व, पाल्पा, अर्घाखाँची, बाँके, कपिलबस्तु, रुपन्देही र दाङले खेलेका हुन् ।

क्वाटरफाइनलबाट कपिलवस्तु, दाङ, रुकुमपूर्व र अर्घाखाँची बाहिरिएका छन् । मुख्यमन्त्री कप प्रदेशस्तरीय महिला भलिबल प्रतियोगितामा प्रदेशका १२ वटै जिल्लाबाट महिला भलिबल खेलाडी सहभागी भएका प्रदेश खेलकुद परिषदका सदस्य सचिव तिरन गौतमले जानकारी दिनुभयो । प्रदेशमा दक्ष महिला खेलाडी उत्पादन गर्न र भलिबलको विकासका लागि प्रदेश स्तरीय प्रतियोगिता आयोजना गरिएको प्रदेश खेलकुद परिषद, लुम्बिनीले जनाएको छ ।

प्रतियोगिताकाे सेमिफाइनल र फाईनल खेल शनिबार हुने आयोजक प्रदेश खेलकुद परिषद लुम्बिनीले जनाएको छ ।
प्रतियोगिताको उपाधि जित्ने टीमले नगद एक लाख, मेडल, ट्रफी र प्रमाण–पत्र पुरस्कार पाउने छ भने उपविजेता टीमले नगद पैसट्टी हजार, मेडल, ट्रफी र प्रमाण–पत्र पुरस्कार पाउने आयोजक प्रदेश खेलकुद परिषदका सदस्य कैलाश रोका मगरले बताउनुभयो । यसैगरी, तृतीय पुरस्कार नगद पैतिस हजार, मेडल, ट्रफी र प्रमाण–पत्र र सान्त्वना हुने टीमले नगद पन्ध्र हजार प्रमाण–पत्र प्राप्त गर्ने उहाँले बताउनुभयो ।
प्रतियोगितामा सर्वोत्कृष्ट खेलाडीलाई नगद दश हजार, मेडल, ट्रफी र प्रमाण–पत्र प्रदान गरिनुका साथै ६ विधामा उत्कृष्ट हुने खेलाडीलाई पनि जनही पाँच हजार, मेडल, ट्रफी र प्रमाण–पत्र प्रदान गरिने उहाँले बताउनुभयो ।