मुख्यमन्त्री कप महिला भलिबलकाे उपाधिका लागि पाल्पा र रुपन्देही भिड्ने
घोराही, २३ चैत । दाङको घोराहीमा जारी मुख्यमन्त्री कप प्रदेश स्तरीय महिला भलिबल प्रतियोगिताकाे फाइनलमा पाल्पा र रुपन्देही भिड्ने भएका छन् ।
प्रदेश खेलकुद परिषद, लुम्बिनीको आयोजनामा जारी भएको प्रदेश स्तरीय प्रतियोगिता अन्तरगत शनिबार भएको दाेस्राे सेमिफाइनलमा रुपन्देहीले बाँकेलाई ३-२ सेटले हराउँदै फाईनल प्रवेश गरेसँगै पाल्पासँग उपाधिका लागि खेल्ने भएका हुन् ।
घोराही उपमहानगरपालिका वडा नम्बर १५ स्थित जिल्ला समन्वय समितिको सहिद मञ्चमा फागुन २० गतेदेखि जारी प्रतियोगिताकाे दाेस्राे सेमिफाइनल खेल निकै प्रतिष्पर्धात्मक भयाे । रुपन्देहीले अन्तिम सेटमा नतिजा आफ्नाे पक्षमा पार्दै सेमिफाइनलबाट बाँकेलाई हराउँदै फाईनलमा पुगेकाे हाे । पहिलाे सेट रुपन्देहीले दाेस्राे सेट बाँकेले तेस्राे सेट रुपन्देहीले चाैथाे सेट बाँकेले जित्दा पाँचौं सेट रुपन्देहीले जित्दै उपाधि नजिक पुगेकाे छ । रुपन्देहीले बाँके विरुद्ध २५-२३, २२-२५, २५-२०, १९-२५ र १५-१० अंकका साथ खेल्याे ।
यसअघिफ शनिबार बिहान भएको पहिलाे सेमिफाइनलमा पाल्पाले राेल्पालाई ३-१ काे सेटमा हराउँदै उपाधि नजिक पुगेको हाे । पहिलाे सेट हारेकाे पाल्पाले उत्कृष्ट पुनरागमन गर्दै ३-१ काे नतिजा आफ्नाे पक्षमा पार्दै उपाधि नजिक पुगेको हाे ।
पाल्पाले राेल्पा विरुद्ध १९-२५, २५-१९, २५-१७ र २५-१४ अंकका साथ जीत निकाल्याे । फाईनल खेल अघि तेस्राे स्थानका लागि अब राेल्पा र बाँके बीच खेल हुनेछ भने उपाधिका लागि दिउँसो २ बजेपछि पाल्पा र रुपन्देही आमनेसामने हुनेछन् ।
लुम्बिनी प्रदेशका १२ वटै जिल्लाबाट मुख्यमन्त्री कप प्रदेशस्तरीय महिला भलिबल प्रतियोगितामा महिला भलिबल खेलाडी सहभागी भएका प्रदेश खेलकुद परिषदका सदस्य सचिव तिरन गौतमले जानकारी दिनुभयो । प्रदेशमा दक्ष महिला खेलाडी उत्पादन गर्न र भलिबलको विकासका लागि प्रदेश स्तरीय प्रतियोगिता आयोजना गरिएको प्रदेश खेलकुद परिषद, लुम्बिनीले जनाएको छ ।
प्रतियोगिताको सेमिफाइनल र फाईनल खेल शनिबार हुने आयोजक प्रदेश खेलकुद परिषद लुम्बिनीले जनाएको छ ।
प्रतियोगिताको उपाधि जित्ने टीमले नगद एक लाख, मेडल, ट्रफी र प्रमाण–पत्र पुरस्कार पाउने छ भने उपविजेता टीमले नगद पैसट्टी हजार, मेडल, ट्रफी र प्रमाण–पत्र पुरस्कार पाउने आयोजक प्रदेश खेलकुद परिषदका सदस्य कैलाश रोका मगरले बताउनुभयो । यसैगरी, तृतीय पुरस्कार नगद पैतिस हजार, मेडल, ट्रफी र प्रमाण–पत्र र सान्त्वना हुने टीमले नगद पन्ध्र हजार प्रमाण–पत्र प्राप्त गर्ने उहाँले बताउनुभयो ।
प्रतियोगितामा सर्वोत्कृष्ट खेलाडीलाई नगद दश हजार, मेडल, ट्रफी र प्रमाण–पत्र प्रदान गरिनुका साथै ६ विधामा उत्कृष्ट हुने खेलाडीलाई पनि जनही पाँच हजार, मेडल, ट्रफी र प्रमाण–पत्र प्रदान गरिने उहाँले बताउनुभयो ।