मुख्यमन्त्री कप महिला भलिबलकाे फाईनलमा पाल्पा
घोराही, २३ चैत । दाङको घोराहीमा जारी मुख्यमन्त्री कप प्रदेश स्तरीय महिला भलिबल प्रतियोगिताकाे फाइनलमा पाल्पा प्रवेश गरेको छ ।
प्रदेश खेलकुलद परिषद, लुम्बिनीको आयोजनामा जारी भएको प्रदेश स्तरीय प्रतियोगिता अन्तरगत शनिबार बिहान भएको पहिलाे सेमिफाइनलमा पाल्पाले राेल्पालाई ३-१ काे सेटमा हराउँदै उपाधि नजिक पुगेको हाे । घोराही उपमहानगरपालिका वडा नम्बर १५ स्थित जिल्ला समन्वय समितिको सहिद मञ्चमा फागुन २० गतेदेखि जारी प्रतियोगिता अन्तरगत पहिलाे सेट हारेकाे पाल्पाले उत्कृष्ट पुनरागमन गर्दै ३-१ काे नतिजा आफ्नाे पक्षमा पार्दै उपाधि नजिक पुगेको हाे । पाल्पाले राेल्पा विरुद्ध १९-२५, २५-१९, २५-१७ र २५-१४ अंकका साथ जीत निकाल्याे । अब दाेस्राे सेमिफाइनलमा बाँके र रुपन्देही बीच खेल भईरहेकाे छ ।
यसअघि राेल्पाले कपिलवस्तुलाई, राेल्पाले दाङलाई क्वाटरफाइनलमा हराउँदै सेमिफाइनल प्रवेश गरेका थिए ।
यसैगरी, बाँकेले रुकुमपूर्वलाई हराउँदै सेमिफाइनल प्रवेश गर्दा रुपन्देहीले अर्घाखाँचीलाई हराएर सेमिफाइनल प्रवेश गरेकाे हाे ।
लुम्बिनी प्रदेशका १२ वटै जिल्लाबाट मुख्यमन्त्री कप प्रदेशस्तरीय महिला भलिबल प्रतियोगितामा महिला भलिबल खेलाडी सहभागी भएका प्रदेश खेलकुद परिषदका सदस्य सचिव तिरन गौतमले जानकारी दिनुभयो । प्रदेशमा दक्ष महिला खेलाडी उत्पादन गर्न र भलिबलको विकासका लागि प्रदेश स्तरीय प्रतियोगिता आयोजना गरिएको प्रदेश खेलकुद परिषद, लुम्बिनीले जनाएको छ ।
प्रतियोगिताको सेमिफाइनल र फाईनल खेल शनिबार हुने आयोजक प्रदेश खेलकुद परिषद लुम्बिनीले जनाएको छ ।
प्रतियोगिताको उपाधि जित्ने टीमले नगद एक लाख, मेडल, ट्रफी र प्रमाण–पत्र पुरस्कार पाउने छ भने उपविजेता टीमले नगद पैसट्टी हजार, मेडल, ट्रफी र प्रमाण–पत्र पुरस्कार पाउने आयोजक प्रदेश खेलकुद परिषदका सदस्य कैलाश रोका मगरले बताउनुभयो । यसैगरी, तृतीय पुरस्कार नगद पैतिस हजार, मेडल, ट्रफी र प्रमाण–पत्र र सान्त्वना हुने टीमले नगद पन्ध्र हजार प्रमाण–पत्र प्राप्त गर्ने उहाँले बताउनुभयो ।
प्रतियोगितामा सर्वोत्कृष्ट खेलाडीलाई नगद दश हजार, मेडल, ट्रफी र प्रमाण–पत्र प्रदान गरिनुका साथै ६ विधामा उत्कृष्ट हुने खेलाडीलाई पनि जनही पाँच हजार, मेडल, ट्रफी र प्रमाण–पत्र प्रदान गरिने उहाँले बताउनुभयो ।