मनसुनजन्य विपद्को जोखिम बढेपछि सतर्कता अपनाउन प्रशासनको आग्रह
दाङ,१६ असार । मनसुन सक्रिय भएसँगै सम्भावित डुबान, पहिरो, चट्याङ र नदी कटान जस्ता विपद्का घटनाबाट सतर्क रहन जिल्ला प्रशासन कार्यालय दाङले सर्वसाधारणलाई आग्रह गरेको छ।
मौसम विज्ञान विभागको पूर्वानुमानअनुसार भारी वर्षा हुने सम्भावना बढेकाले विपद् व्यवस्थापनको पूर्वतयारीस्वरूप जिल्ला प्रशासनले विभिन्न सुरक्षा निकाय, स्थानीय तह, सामाजिक संघसंस्था, सञ्चारकर्मी तथा नागरिक समाजसँग समन्वय गरी तयारी अवस्थामा रहन निर्देशन दिएको हो।
प्रमुख जिल्ला अधिकारी एवं जिल्ला विपद् व्यवस्थापन समितिका दाङका अध्यक्ष कृष्णप्रसाद लम्सालले सोमबार हस्ताक्षरित सूचनामा विपद्को जोखिमलाई मध्यनजर गर्दै क्यूआरटी ९त्तच्त्० टोलीहरुलाई तयारी अवस्थामा राखिएको जनाइएको छ। विपद् न्यूनीकरण र प्रभावकारी व्यवस्थापनका लागि आवश्यक स्रोतसाधन परिचालनको तयारीसमेत भइरहेको जानकारी दिइएको छ।
साथै, सूचना प्राप्त गर्न तथा दिन सहज होस् भनेर स्थानीयवासी, सञ्चारकर्मी र सरोकारवाला सबैलाई सक्रिय भूमिका निर्वाह गर्न तथा विपद् सम्बन्धी सूचना तत्काल सम्बन्धित निकायलाई जानकारी गराउन अनुरोध गरिएको छ।जिल्ला विपद् व्यवस्थापन समिति दाङले विपद्को समयमा सहयोगको भावना र सजग सहभागिता आवश्यक रहेको जनाएको छ।