प्रहरीमा एक सय २० मुद्दा दर्ता, ८६ जना पक्राउ
दाङ, २ भदौ । जिल्ला प्रहरी कार्यालय दाङमा साउन महिनामा एक सय २० वटा मुद्दा दर्ता भएका छन् । दर्ता भएका मुद्दामध्ये ३९ वटा फस्र्योट भएका छन् भने ८९ वटा मुद्दा प्रक्रियामै रहेको जिल्ला प्रहरी कार्यालय दाङले जनाएको छ । उक्त मुद्दामा ८६ जना पक्राउ परेका छन् भने १७ जना फरार रहेका छन् ।
प्रहरीले सार्वजनिक गरेको साउन महिनाको तथ्याङ्क अनुसार साउन महिनामा सबैभन्दा धेरै २५ वटा आत्महत्यासम्बन्धी घटना दर्ता भएका छन् । जसमा २० वटा झुन्डिएर र पाँच वटा बिस सेवन गरेर आत्महत्या गरेका घटना दर्ता भएको जिल्ला प्रहरी कार्यालय दाङका सूचना अधिकारी एवम् प्रहरी नायव उपरीक्षक चक्रबहादुर शाहले जानकारी दिएका छन् ।
उनका अनुसार आत्महत्या गर्नेमा १८ वर्षदेखि ६० वर्षमाथि उमेर समूहका १७ जना पुरुष र आठ जना महिला रहेका छन् । जिल्लामा आत्महत्याका घट्नामा दिनहु वृद्धि हुनु गम्भीर चिन्ताको विषय भएको प्रहरी नायव उपरीक्षक शाहले बताएका छन् ।
प्रहरीका अनुसार साउन महिनामा १८ वटा घरेलु हिंसासम्बन्धी उजुरी परेका छन् ।
यसैगरी प्रहरीमा १७ वटा बैङ्किङ कसुरसम्बन्धी, १६ वटा साधारण चोरीसम्बन्धी, अभद्र व्यवहारसम्बन्धी १२ वटा, पुटकर ज्यानसम्बन्धी नौ वटा, सवारी ज्यान र भवितव्य ज्यानसम्बन्धी आठ÷आठ वटा, लागूऔषधका सात वटा, जबर्जस्ती करणीसम्बन्धी पाँच वटा, सवारी भवितव्य, ठगी, बालयौन दुरुपयोग र आत्महत्या दुरुत्सानसम्बन्धी दुई÷दुई वटा, ज्यान मार्ने उद्योग, सवारी अङ्गभङ्ग, जबर्जस्ती करणी प्रयास, चोरी उद्योग र कर्तत्व ज्यान मुद्दाका एक÷एक गरेर एक सय २० मुद्दा प्रहरीमा दर्ता भएका छन् ।
यसैगरी प्रहरीले साउन महिनामा १७ जना फरार प्रतिवादी पक्राउ गरेको छ । अदालतको फैसल्लापछि फरार रहेका १६ जनालाई जिल्लाका विभिन्न ठाउँबाट पक्राउ गर्दा २० वर्ष पाँच महिना १५ दिन कैद र ३४ लाख ९६ हजार चार सय १९ रुपैयाँ जरिवाना असुल उपर भएको पत्रकार सम्मेलनमा सूचना अधिकारी शाहले जानकारी गराएका थिए ।
यसैगरी ट्राफिक नियम विपरीत सञ्चालन हुने एक हजार पाँच सय ३९ वटा विभिन्न सवारीसाधनलाई कारबाही गर्दा एक महिनाको अवधिमा १५ करोड ७९ हजार पाँच सय रुपैयाँ राजस्व सङ्कलन भएको छ ।