३२ औँ स्थापना दिवसमा नेपाल महिला सामुदायिक सेवा केन्द्रकाे याेगदानकाे चर्चा

---

घोराही, ३ भदौ । बालबालिका, युवा तथा महिलाहरूको सामाजिक शसक्तीकरण गर्ने लक्ष्यका साथ काम गर्दै आएको नेपाल महिला सामुदायिक सेवा केन्द्र, दाङले आफ्नो ३२ औँ स्थापना दिवसको अवसरमा पहिलो दिन रक्तदान कार्यक्रम गरेको छ ।
२०५० सालमा स्थापना भएको संस्थाले सामाजिक उत्तरदायित्व स्वरुप रक्तदान कार्यक्रम गरेर स्थापना दिवस मनाएको हो ।

नेपाल महिला सामुदायिक सेवा केन्द्रका संस्थापक अध्यक्ष विमला योगीको अध्यक्षता तथा जिल्ला समन्वय समिति दाङका प्रमुख नित्यानन्द शर्माको प्रमुख आतिथ्य एवम् घोराही १५ का वडाअध्यक्ष रमेशकुमार पाण्डेको विशिष्ट आतिथ्यमा मंगलबार एक कार्यक्रम गरी रक्तदान गरिएको हो ।
कार्यक्रममा प्रमुख अतिथि शर्माले महिला, बालबालिका, सिमान्तकृत, असहाय, पछि पारिएका वर्गको उत्थानका लागि ३२ वर्षअघि संस्थाले लिएको परिकल्पना कार्यान्वयनबाट धेरैको जीवनमा परिवर्तन ल्याउन सफल भएको बताउनुभयो । उहाँले सामाजिक संघसंस्थाले जस्तै काम राज्यले इमान्दारीपूर्वक गर्न सकेको भए देशले कायापलट गर्न समय नलाग्ने विश्वास व्यक्त गर्नुभयो ।

महिला, बालबालिकाको हित नभएसम्म सभ्य र भव्य समाज बन्न सक्दैन भनेर हिजोका दिनमा कठिन परिस्थितिबाट शुरु गरिएको कामले ठूलो संघर्षबाट उपलब्धि हासिल गरेको भन्दै प्रशंसा व्यक्त गर्नुभयो ।
‘महिला सक्षम हुनु भनेको समाजबाट गरिबी निवारणको आधार बन्नु हो । समाजमा समृद्धिको यात्रा थालनी हुनु हो’ उहाँले भन्नुभयो ‘नेपाल महिला सामुदायिक सेवा केन्द्रले नागरिकको अवस्था फेर्न गर्दै आएको प्रयासले रोजगारी सिर्जना गर्नेदेखि स्वदेशमै कमाउने र रमाउने वातावरण निर्माण गरेको छ ।’
वडाअध्यक्ष पाण्डेले समाज रुपान्तरणका लागि २०–२२ वर्षको उमेरमा तत्कालीन समयमा संस्थापकहरुले लिएको सोँचलाई सफलतामा रुपान्तरण गर्ने काम अनुकरणीय रहेको बताउनुभयो । भौतिक विकासले मात्रै समाज समृद्ध बन्न सक्दैन भन्ने मान्यतालाई आत्मसात गरेर काम गरिरहेको संस्थाले जस्तै मानव संशाधन र सचेतनाको विकासमा अब सबैको ध्यान जान आवश्यक रहेको बताउनुभयो ।
नेपाल पत्रकार महासंघ दाङ शाखा अध्यक्ष सन्तोष सुवेदीले सामाजिक सेवाको क्षेत्रमा संस्थाले गरेको कामले सकारात्मक प्रभाव पारेको बताउनुभयो ।
राज्यले प्राथमिकता राखेका कुरा पनि नागरिकले उपभोग गर्न नपाईरहेको अवस्थामा नेपाल महिला सामुदायिक सेवा केन्द्रले सेवा प्रदान गरेर मानवता जागृत गर्ने काम गरेको बताउनुभयो ।
घोराही उपमहानगरपालिकाकी जनस्वास्थ्य प्रवद्र्धन शाखा प्रमुख राधा पौडेलले दिगो विकास लक्ष्यका विषयमा सराहनीय काम गरेको जिल्ला ट्राफिक प्रहरी कार्यालय दाङका प्रमुख उपेन्द्र बमले युवा, महिला, बालबालिकालाई सही मार्गमा हिँडाउन संस्थाले गर्दै आएको कामलाई  थप प्रभावकारी बनाउन सुझाव दिनुभयो । पछिल्लो समय युवाहरु लागुऔषध दुव्र्यसनमा पर्ने गरेका घटनालाई ध्यानमा राखेर लागूऔषध नियन्त्रण, मनोसामाजिक परामर्श जस्ता कामलाई समुदायमा पुर्याईराख्न आग्रह गर्नुभयो ।
महिलाको सामाजिक सशक्तीकरण, आर्थिक सशक्तीकरण, पर्यावरणीय विकास र दीगोपना, मनोसामाजिक परामर्श, सीप विकासलगायत विभिन्न क्षेत्रमा काम गर्दै आएको संस्थाले गरेको प्रयासले थुप्रैको जीवनमा सकारात्मक परिवर्तन ल्याउन सकेको संस्थाकी अध्यक्ष कल्पना न्यौपानेले बताउनुभयो ।
संस्थाले अहिले विभिन्न दातृ निकाय र साझेदार संस्थाहरुसँगको सहकार्यमा समुदाय स्तरमा परियोजनामार्फत काम गर्दै आएको छ ।
अति विपन्न परिवारका बालबालिकाहरूलाई औपचारिक शिक्षामा निरन्तरता, युवा तथा महिलाहरूलाई स्वरोजगार बनाउन सहकारी संस्था स्थापना तथा परिचालन, लघुवित्त कार्यक्रम तथा उद्यम विकास कार्यक्रममार्फत तालिम, सिप तथा उत्पादनलाई बजारीकरण गर्दै आत्मनिर्भर बनाउने कार्य गर्दै आएको संस्थापक अध्यक्ष योगीले बताउनुभयो ।
महिलाहरूसँग सम्बन्धित घरेलु हिंसा, द्वन्द्व प्रभावित महिलाहरूको मानसिक स्वास्थ्य, द्वन्द्व प्रभावित परिवारका बालबालिकाहरूलाई शिक्षा तथा स्वास्थ्यमा पहुँच पुर्याउने काममा पनि संस्थाले काम गर्दै आएको संस्थाका सूचना अधिकारी आरके शीतलले बताउनुभयो । दाङ, रोल्पा, रुकुम पूर्व, रूकुम पश्चिम, जाजरकोटलगायतका जिल्लामा आफ्नो सेवा बिस्तार गरेर काम गर्दै आएको उहाँको भनाई छ ।
विभिन्न रचनात्मक काम गरेर साताव्यापी रुपमा स्थापना दिवस मनाउने क्रममा पहिलो दिन रक्तदान गरिएको हो । नेपाल रेडक्रस सोसाईटी रक्तसंचार केन्द्र घोराहीको प्राविधिक सहयोगमा गरिएको रक्तदानमा २३ जनाले रक्तदान गरेका छन् ।
रक्तदान गर्नेहरुमा मदनकुमार शर्मा, विवेक केसी, पवन याेगी, ईन्द्रबहादुर रेग्मी, मधुसुदन न्याैपाने, कविता डिसी, अस्मिता रेग्मी, गगन याेगी, सुनिल जिसी, भुवन भण्डारी, पवित्रा चाैधरी, अमितकुमार यादव, अम्बिका वली, प्रमिला पुन मगर, शरद महतरा, वुद्धिकुमारी जिसी, विवेक चाैधरी, बसन्ता बस्नेत, अञ्जु हमाल, प्रमेश चाैधरी, उर्मिला बस्नेत, कल्पना डाँगी र सुष्मा बिक रहेका छन् ।
कार्यक्रमको सहजीकरण नेपाल महिला सामुदायिक सेवा केन्द्रकी सचिव शिवा योेगीले गर्नुभएको थियो  ।