घोराहीमा प्रथम शक्तिमान स्मृति फुटबल प्रतियोगिता हुने
घोराही, ५ भदौ । दाङको घोराहीमा ‘प्रथम शक्तिमान स्मृति फुटबल प्रतियोगिता–२०८२’ हुने भएको छ ।
फुटबल खेलाडी स्वर्गीय शक्तिमान बुढामगरको सम्झनामा आगामी असोज ४ गतेदेखि प्रतियोगिता हुने आयोजक युनाइटेड नयाँ बजार युवा क्लब (युएनबीसी)ले जानकारी दिएको छ । आयोजक युनाइटेड नयाँ बजार युवा क्लव (युएनबीसी) ले विहीवार घोराहीमा पत्रकार सम्मेलको आयोजना गरेर प्रतियोगिताका बारेमा जानकारी गराएको हो ।
युएनबीसीका सहसचिव तथा प्रतियोगिता संयोजक गोपाल कुँवरले पूर्व फुटबल खेलाडी साथीको सम्झनासँगै स्थानीयस्तरमा फुटबल खेलको विकासका लागि प्रतियोगिता आयोजना गरिएको बताउनुभयो ।
उहाँका अनुसार प्रतियोेगिता घोराही उपमहानगरपालिका–१७ गैरागाउँस्थित लुम्बिनी फुटबल एकेडेमी खेल मैदानमा हुने छ । प्रतियोगिता संयोजक कुँवरका अनुसार प्रतियोगिताको उपाधि जित्ने टोलीले नगद एक लाख ५० हजार, शिल्ड, मेडल र प्रमाणपत्र पाउनेछ भने उपविजेता हुने टोलीले नगद ७० हजारसहित शिल्ड, मेडल र प्रमाणपत्र पाउनेछ ।
त्यसैगरी प्रतियोगितामा उत्कृष्ट खेलाडी, उत्कृष्ट गोलकिपर, सर्वाधिक गोलकर्ता, उत्कृष्ट डिफेन्डर र उदीयमान खेलाडीलाई जनही पाँच हजार रुपियाँ र प्लेयर अफ द म्याचलाई नगद एक हजारसहित ट्रफिको व्यवस्था गरिएको क्लवका कोषाध्यक्ष मनकाजी बुढाले जानकारी दिनुभएको छ । उहाँका अनुसार प्रतियोगितामा सहभागी हुनका लागि दर्ता शुल्क पाँच हजार रुपियाँ तोकिएको र आगामी असोज २ गतेसम्म टिम दर्ता गर्न सकिनेछ ।