स्वास्थ्य बिमा कार्यक्रम, दाङमा ७१ हजार बढी आबद्ध
लीलाधर वली
दाङ, ६ भदौ । दाङमा पाँच बर्षको अवधिमा स्वास्थ्य बिमा कार्यक्रममा ७१ हजार बढी नागरिक आबद्ध भएका छन् । राष्ट्रिय जनगणना २०७८ अनुसार जिल्लाको छ लाख ७४ हजार नौ सय ९३ जनसङ्ख्यामध्ये १० दशमलव ६२ प्रतिशत अर्थात् ७१ हजार आठ सय १८ जना नागरिक स्वास्थ्य बिमा कार्यक्रममा आवद्ध भएका हुन् ।
जिल्लामा २०७७ माघ ३० गतेदेखि सुरु भएको स्वास्थ्य बिमा कार्यक्रममा आर्थिक बर्ष २०८१÷०८२ सम्म ३७ हजार सात सय ९८ जना महिला र ३३ हजार नौ सय २० जना पुरुष गरी ७१ हजार सात सय १८ जना नागरिक आबद्ध भएको स्वास्थ्य बिमा बोर्ड दाङका संयोजक वसन्त लामिछानेले जानकारी दिएका छन् । उनका अनुसार स्वास्थ्य बिमामा आबद्ध भएकामध्ये १७ हजार छ सय ५६ जना ज्येष्ठ नागरिक, एक हजार नौ सय ३५ जना अतिअपाङ्गता भएका अर्थात् रातो कार्ड प्राप्त गरेका, तीन सय ९७ जना एचआइभी सङ्क्रमित, १८ जना टिभीका बिरामी, चार जना कुष्ठरोगका बिरामीसँगै दुई हजार ७२ जना महिला स्वास्थ्य स्वयम्सेविका रहेका छन् ।
जिल्लाका १० स्थानीय तहमध्ये घोराही उपमहानगरपालिकामा स्वास्थ्य बिमा गराउनेको सङ्ख्या बढी छ । शाखा संयोजक लामिछानेका अनुसार घोराहीमा ३७ हजार दुई सय आठ जनाले स्वास्थ्य बिमा गराएका छन् । यसैगरी तुलसीपुर उपमहानगरपालिकामा १६ हजार चार सय ६७ जना, लमही नगरपालिकामा चार हजार एक सय ९९ जना, राप्ती गाउँपालिकामा तीन हजार दुई सय ६९ जना, गढवा गाउँपालिकामा दुई हजार छ सय ३३ जनाले स्वास्थ्य बिमा गराउँदा राजपुर गाउँपालिकामा एक हजार ३६ जना, बंगलाचुली गाउँपालिकामा एक हजार चार सय ३१ जना, दंगीशरण गाउँपालिकामा एक हजार आठ सय १३ जना, शान्तिनगर गाउँपालिकामा एक हजार छ सय ५३ जना र बबई गाउँपालिकामा दुई हजार नौ जना स्वास्थ्य बिमा कार्यक्रममा आबद्ध भएका छन् ।
शाखा संयोजक लामिछानेका अनुसार जिल्लामा पछिल्लो समय स्वास्थ्य बिमा कार्यक्रममा आबद्ध हुने नागरिकको सङ्ख्या बढ्दै गएको छ । स्वास्थ्य बिमा गराउँदा हुने लाभका बारेमा जानकारी भएसँगै बिमा कार्यक्रममा आबद्ध हुने नागरिकको सङ्ख्या बढ्दै गएको बताए । बिमा दर्ताका लागि जिल्लाका सय वडामा सहयोगी कार्यकर्ताले काम गरिरहेको संयोजक लामिछाने बताउँछन् । स्वास्थ्य बिमा कार्यक्रममा आबद्ध भएपछि पाँच जनाको परिवारसम्मले वर्षमा तीन हजार पाँच सय प्रिमियम शुल्क तिरेपछि सरकारले एक लाख रुपैयाँ बराबरको स्वास्थ्य सेवा दिने गरेको छ ।
यसैगरी छ जनादेखि माथिको परिवार सदस्य भए प्रतिसदस्य सात सय रुपैयाँ थप जम्मा गर्दै जाने र दुई लाख रुपैयाँको बिमा सरकारले गर्ने गरेको संयोजक लामिछानेले बताउँछन् । सरकारले अति गरिब, पूर्ण अपाङ्गता, क्षयरोग तथा कुष्ठरोग, एचआइभी सङ्क्रमित र ७० वर्षभन्दा माथिका ज्येष्ठ नागरिकलाई एक लाख रुपैयाँसम्मको निःशुल्क बिमा गर्ने गरेको छ भने महिला स्वास्थ्य स्वयम्सेविकाको परिवारलाई योगदानको रकममा ५० प्रतिशत छुट दिने गरेको छ ।
जिल्लामा राप्ती स्वास्थ्य विज्ञान प्रतिष्ठान घोराही, प्रादेशिक अस्पताल तुलसीपुर, लमही अस्पताल, रक्षाचौर आँखा अस्पताल, श्रीगाउँ प्राथमिक स्वास्थ्य केन्द्र, प्राथमिक स्वास्थ्य केन्द्र उजा र बंगलाचुली अस्पतालमा बिमा गरेबापतको उपचार सेवा केन्द्र तोकिएको छ । स्वास्थ्य बिमा कार्यक्रम अन्तर्गत बिरामी भएका व्यक्तिलाई एक सय ३३ प्रकारका औषधी, सबै प्रयोगशाला र भेन्ट्रिलेटरसम्मको उपचार निःशुल्क हुने जनाएको छ ।