दाङमा कोभिड–१९ विरुद्ध ११ हजार बढीले लगाए खोप
दाङ, ८ भदौ । कोडिभ–१९ को नयाँ ‘ओमिक्रोन भेरियन्ट’ का विरुद्ध दाङमा ११ हजार आठ सय २१ जना नागरिकले फाइजर–बायोएनटेक मोनोभ्यालेन्ट खोप लगाएका छन् । जिल्लाका दश स्थानीय तहका १२ हजार नागरिकलाई खोप लगाउने लक्ष्य भए पनि ११ हजार आठ सय २१ जनाले खोप लगाएका हुन् ।
दाङमा कोडिभ–१९ विरुद्धको खोप अभियानका क्रममा सबैभन्दा धेरै तुलसीपुर उपमहानगरपालिकामा पाँच हजार जनाले कोभिड–१९ विरुद्ध खोप लगाएको स्वास्थ्य कार्यालय दाङका खोप फोकल पर्सन भानुज्योति वलीले जानकारी दिएका छन् । खोप फोकल पर्सन वलीका अनुसार तुलसीपुरमा पाँच हजार चार जनालाई खोप लगाउने लक्ष्य थियो । त्यसैगरी घोराही उपमहानगरपालिकामा दुई हजार चार जनालाई खोप लगाउने लक्ष्य भएकोमा एक हजार नौ सय जना, दंगीशरण गाउँपालिकामा ६ सय ९६ जनामध्ये ६ सय ३५ जना, शान्तिनगर गाउँपालिकामा पाँच सय जनामध्ये चार सय ९३ जना, बबई गाउँपालिकामा दुई सय ९४ जनामध्ये दुई सय ८२ जना र राजपुर गाउँपालिकामा दुई सय चार जनामध्ये दुई सय तीन जनाले खोप लगाएका छन् ।
राप्ती गाउँपालिकामा एक हजार २० जना, गढवा गाउँपालिकामा एक हजार २० जना, लमही नगरपालिकामा नौ सय ६० जना र बंगलाचुली गाउँपालिका तीन सय जनालाई खोप लगाउने लक्ष्य भएकोमा सतप्रतिशतले खोप लगाएको उनले बताएका छन् । जिल्लामा लक्ष्यअनुसार कोभिड विरुद्धको खोप लगाउने तयारी भए पनि नसकिएको खोप फोकल पर्सन वलीले बताए ।
नेपालमा पछिल्लो समय कोरोना भाइरसअन्तर्गत नयाँ ‘ओमिक्रोन भेरियन्ट’ देखा परेपछि त्यसका विरुद्ध जिल्लामा दश स्थानीय तहमा भएका ९५ वटा खोप केन्द्रमार्फत भदौ २ देखि ४ गतेसम्म १२ वर्ष उमेर समूहभन्दा माथिका बालबालिका, वयस्क तथा ज्येष्ठ नागरिकलाई कोडिभ–१९ विरुद्धको खोप लगाइएको थियो । २ देखि ४ गतेसम्म अभियान सञ्चालन भएको थियो । खोप फोकल पर्सन वलीले कोभिड–१९ विरुद्ध निश्चित औषधी उपचार नभएकाले रोगको सङ्क्रमणबाट बच्नका लागि सरकारले निःशुल्क रूपमा उपलब्ध गराएको खोप जोखिम नागरिकलाई लगाइएको हो ।