इम्बोस्ड नम्बर प्लेट देवनागरी लिपीमा कार्यान्वयन गर्न नागरिक समाजको आग्रह
घोराही, ८ भदौ । नागरिक समाज दाङले नेपाल सरकारबाट आगामी असोज १ गतेदेखि सवारीसाधनमा अनिवार्य रुपमा लागु गर्न लागिएको इम्बोस्ड नम्बर प्लेट देवनागरी लिपीमा कायम गरेर मात्रै कार्यान्वयन गर्न आग्रह गरेको छ ।
समाजको आईतबार घोराहीमा बसेको बैठकले संविधान प्रदत्त सरकारी कामकाजको भाषा नेपाली हुने व्यवस्था अनुसार इम्बोस्ड नम्बरको अंक र अक्षर देवनागरी लिपीमा कायम गर्न र सहजताका साथ उपलब्ध हुने व्यवस्था मिलाउन सरकारको ध्यानाकर्षण गराएको छ ।
समाजका जिल्ला संयोजक नीमबहादुर थापाको अध्यक्षतामा बसेको बैठकले घोराही उपमहानगरपालिका वडा नम्बर १४ झिँगौरास्थित स्वर्गद्वारी आश्रमको नजिकै रहेको वर्षौ पुरानो सार्वजनिक पीपल चौतारी परिसरमा वडा कार्यालयले स्थानीय टोल विकास संस्थाका लागि भवन निर्माण गरिदिँदा ऐतिहासिक धरोहर नै मासिने खतरा देखिएकाले उक्त संरचना हटाई साविककै अवस्थामा चौतारीको व्यवस्थापन गर्न पनि सरोकार निकायको ध्यानाकर्षण गराएको छ ।
यसैगरी, भारत र चीन बीच हालै भएको लिपुलेक व्यापारिक द्विपक्षीय सम्झौताले नेपालको सार्वभौम सत्ता र भौगोलिक अखण्डता माथि आँच आएकाले उक्त सम्झौतामाथि तत्काल पुनर्विचार गर्न र कुटनीतिक तहबाट पहल गरी त्रिपक्षीय आपसी सहमति अनुरुप गर्ने व्यवस्था मिलाउन सरकारको ध्यानाकर्षण गराएको छ ।
आगामी असोजको २५, २६ र २७ गते नेपाल संस्कृत विश्वविद्यालय बेलझुण्डीमा हुन लागेको अन्तर्राष्ट्रिय योग सम्मेलनलाई भव्य रुपमा सम्पन्न गर्न समाजका तर्फबाट आवश्यक सहयोग र पहल गर्ने निर्णय पनि भएको समाजका सचिव नारायणप्रसाद श्रेष्ठले जानकारी दिनुभयो । उहाँका अनुसार, बैठकले नेपाली समुदायमा अटवारी, हरितालिका तिजलगायत पर्वहरु भित्रिएकाले ती पर्वहरु सभ्य, मर्यादित र व्यवस्थित रुपमा मनाउँदै परम्परागत संस्कार, संस्कृति संरक्षण र प्रवद्र्धनमा ध्यान दिन पनि सरोकार सबैमा आग्रह गरिएको छ ।