खुल्ला आईटिएफ तेक्वान्दोमा ज्योतिपुञ्ज च्याम्पियन
दाङ,१४ मंसिर । घोराहीमा भएको खुल्ला आईटिएफ तेक्वान्दो प्रतियोगिता–२०८२ मा ज्योतिपुञ्ज आवासीय माध्यमिक विद्यालयलको टिम च्याम्पियन बनेको छ ।
घोराही आईटिएफ तेक्वान्दो डोजाङको आयोजनामा घोराही उपमहानगरपालिका–१७ स्थीत चौघरामा शनिवार भएको प्रतियोगितामा दश स्वर्णसहित २७ पदक जित्दै ज्योतिपुञ्ज माध्यामिक विद्यालयको टिम च्याम्पियन बनेको हो । च्याम्पियन बनेको घोराही–१५ भरतपुरको ज्योतीपुञ्जले प्रतियोगितामा उत्कृष्ट प्रदर्शन गर्दै दश स्वर्णसहित सात रजत र दश काश्य पदक प्राप्त गरेको हो ।
त्यसैगरी प्रतियोगितामा सात स्वर्ण, दश रजत र तीन काश्य गरि २० पदक जित्दै घोराही–१७ चौघेराको गोरक्ष रत्ननाथ माध्यमिक विद्यालयल दोस्रो बन्न सफल भएको छ । चार स्वर्ण, तीन रजत र छ काश्य गरि १३ पदक प्राप्त गर्दै घोराही उपमहानगरपालिका–१३ डुम्वरगाउँको मेरील्याण्ड एकेडेमीले तेश्रो स्थान लिदा दुई स्वर्ण, तीन रजत र पाँच काश्य गरी दश पदकसहित घोराही–४ गोग्लीको सगरमाथा आवासीय माध्यमिक विद्यालय चौथो तथा एक स्वर्ण, दुई रजत र चार काश्यसहित सात पदक जित्दै भरतपुर डोजाङले प्रतियोगितामा सान्त्वना स्थान प्राप्त गर्न सफल भएको हो ।
प्रतियोगितामा उत्कृष्ट खेलाडीका रुपमा महिलातर्फ रोजिला वली र पुरुषतर्फ गौरव पुलामी घोषित भएका थिए । प्रतियोगितामा अनुशासित टिमका रुपमा सगरमाथा आवासीय माध्यमिक विद्यालय पुरस्कृत भएको थियो । घोराही नगर आईटिएफ तेक्वान्दो डोजाङका प्रमुख लीलाधर बस्नेतको अध्यक्षता तथा लुम्बिनी खेलकुद परिषदका सदस्य सचिव तिरणदाज गौतम, दाङ जिल्ला आईटिएफ तेक्वान्दो संघका अध्यक्ष भीमबहादुर थापालगायतले बिजेता खेलाडीलाई ट्रफि,मेडल र प्रमाणपत्र प्रदान गरेका थिए । कार्यक्रमको सहजीकरण दिपिका गिरीले गरेकी थिइन । प्रतियोगितामा घोराही क्षेत्रका आठ टिमका एक सय ६० बढी खेलाडीको सहभागीता रहेको थियो ।
