सर्वोत्तम बहुउद्देश्यीय सहकारी राष्ट्र समृद्धिको आधार बन्दै

---

घोराही २५, पुस । सर्वाेत्तम बहुउद्देश्यीय सहकारी संस्था लिमिटेडको सातौँ वार्षिक साधारणसभा सम्पन्न भएको छ । संस्थाका अध्यक्ष ध्रुवराज पौडेलको अध्यक्षता तथा घोराही उपमहानगरपालिका वडा नम्बर १५ का वडा अध्यक्ष रमेश पाण्डेको प्रमुख आतिथ्यतामा शनिबार वार्षिक साधारण सभा सम्पन्न भएको हो ।

कार्यक्रममा बोल्ने वक्ताहरुले सहकारीको सिद्धान्तलाई आत्मसात गर्दै अघि बढेको सर्वाेत्तमले अहिले शेयर सदस्य र सेवाग्राहीको मन जित्दै आफ्नो कामको दायरा बढाउँदै लगेकोमा खुशी व्यक्त गरेका छन् । युवाहरुको बाहुल्य रहेको संस्थाले सहकारी बजार संचालनदेखि वन वातावरण संरक्षण र जडीबुटी उत्पादनमा समाहित गर्नुका साथै यसबाट प्रत्यक्ष अप्रत्यक्ष धेरैले लाभ लिन पाएको बताए ।

संस्थाले आर्थिक वर्ष २०७७–०७८ मा कुल ६१ लाख ६० हजार ७९१ कारोबार गरेकोमा ६ लाख ८८ हजार ६९४ रुपैयाँ मुनाफा कमाउन सफल भएको जानकारी गराइएको थियो । कार्यक्रममा प्रमुख अतिथि पाण्डेले सहकारीका माध्यमबाट आयआर्जनका क्षेत्रमा लाग्न प्रेरित गर्नुका साथै सहकार्यको माध्यमबाट राष्ट्रलाई सहकारीको माध्यमबाट ठूलो पुगेको बताए । अब सरकारको नीति पनि स्थानीय स्तरमा हुने काम र उत्पादन सहकारीको माध्यमबाट हुन सके प्रभावकारी हुने उनको भनाई थियो । खासगरी बहुउद्देश्यीय सहकारीहरुले आफ्नो नीति तथा कार्यक्रम अुनसार काम गर्न सकेको खण्डमा समाजमा धेरै राम्रा काम पनि हुन सक्छन् भन्ने उदाहरण सर्वोत्तम सहकारी बन्न सकेको उनले बताए ।

सो सहकारीले अबको नीति आफ्नो संस्थामा शेयर वृद्धि गर्ने, वचत तथा ऋण परियोजनालाई प्रभावकारी बनाउने, सहकारीको विषयमा नागरिक स्तरमा अभिमुखीकरणलाई निरन्तरता दिने लक्ष्य राखेको छ । यस्तै, संस्थामाफृत प्रवाह हुने सेवामा समान व्याजदर, ऋण अवधि, व्याजदरमा घट्दो क्रमा तिर्ने सुविधा, लचिलो किस्ताबन्दी, व्याज , जरिवानामा छुट, राजश्व छुटलगायतका कुरालाई पनि प्राथमिकतामा राखेको संस्थाका कोषाध्यक्ष गुरुप्रसाद खनाल आर्थिक प्रतिवेदन प्रस्तुतका क्रममा बताए । यसैगरी, लेखा सुपरीवेक्षण समिति संयोजक खिमराज खनालले आफ्नो वार्षिक प्रतिवेदन प्रस्तुत गर्दै हाल ५ सय ४४ शेयर सदस्य रहेकोमा अब चालु आर्थिक वर्षमा शेयर सदस्य संख्या ८०० पुर्याउने लक्ष्य रहेको बताए ।

यसैबीच, संस्थाले विभिन्न विधामा असल व्यवहार गर्ने सदस्यहरु तथा नियमित वचतकर्तालाई विशेष सम्मान गरेको छ । नियमित वचतकर्ताका रुपमा कुसुम गौतम शर्मालाई, असल ऋण कारोबार गर्ने शान्ता केसीलाई सम्मान गरिएको हो भने शेयर संख्या वृद्धि गर्ने सदस्यका रुपमा शालिकराम खनाललाई विशेष सम्मान गरिएको छ ।

यसैगरी, सहकारी बजारमा सबैभन्दा बढी कारोबार गर्ने १० जना सदस्यहरुलाई पनि सम्मान गरिएको छ । सम्मानित हुनेहरुमा सुनकुमारी घर्ती, कमल थपलिया, नविनकुमार पाण्डे, दिनेश गौतम, ज्योतिपुञ्ज आवासीय माध्यमिक विद्यालय भरतपुर, सुनिता खड्का, पद्मा लम्साल, लोकेन्द्र बुढाथोकी, गिरीराज शर्मा, सरस्वता पार्धे रहेका छन् । उपाध्यक्ष शालिकराम खनालको स्वागत मन्तव्यबाट शुरुभएको कार्यक्रमको सहजीकरण सचिव हेमराज शर्माले गरेका थिए ।