अन्तर पालिका शिक्षक भलिबल प्रतियोगिताको उपाधि घोराही प्याब्सनलाई
फाल्गुन २६, २०८०
दाङ, २६ फागुन । निजी तथा आवासीय विद्यालय अर्गनाइजेसन नेपाल (प्याब्सन) दाङको आयोजनामा भएको अन्तर पालिका शिक्षक भलिबल प्रतियोगिताको उपाधि प्याब्सन घोराहीको समूह (क) ले जितेको छ ।
प्याब्सन दाङको आयोजनामा शनिबार दाङको घोराहीस्थित मेचीकाली सेकेन्डरी बोर्डिङ स्कुलमा भएको प्रतियोगितामा प्याब्सन घोराहीको समूह (क) ले उपाधि जितेको हो ।
त्यस्तै प्रतियोगितामा प्याब्सन घोराहीको समूह (ख) उपविजेता भएको छ । साथै प्रतियोगितामा तुलसीपुर प्याब्सनको समूह (क) तृतीय भएको थियो ।प्रतियोगितामा घोराही प्याब्सनबाट २ , तुलसीपुर प्याब्सनबाट २ र नगर प्याब्सनबाट १ गरी ५ समूहको सहभागिता रहेको थियो ।
कार्यक्रम प्याब्सन दाङका उपाध्यक्ष तथा अतिरिक्त क्रियाकलापका संयोजक चक्रबहादुर रावतको अध्यक्षता तथा प्याब्सन केन्द्रीय सचिव यादव गिरीको प्रमुख आतिथ्यतामा सम्पन्न भएको थियो । कार्यक्रममा जिल्ला अध्यक्ष मधुसुदन केसीले धन्यवाद ज्ञापन गरेका थिए ।
घोराही नगर प्याब्सनका अध्यक्ष बीरेन्द्र चन्दको स्वागत मन्तव्यबाट सुरू भएको कार्यक्रमको सहजीकरण जिल्ला सचिव आदिम केसीले गरेका थिए ।
