Ad Area

नगरस्तरीय बास्केटबलको उपाधि गुरुकुुल एकेडेमीलाई


घोराही, १५ मंसिर । घोराहीमा भएको दोस्रो नगरस्तरीय बास्केटबल प्रतियोगिता–२०८१ को उपाधि साविक विजेता गुरुकुुल एकेडेमी घोराहीले जितेको छ ।

घोराही उपमहानगरपालिका–१८ सालघारीमा शनिबार भएको अन्तर विद्यालयस्तरीय बास्केटबल प्रतियोगिताको फाईनल खेलमा गुरुकुल एकेडेमीले गोरखा मावि घोराहीलाई ६६–६५ अंकका साथ हराउँदै लगातार दोस्रो पटक उपाधि जितेको हो ।

६५–६२ अंकले पछि परेको अवस्थामा गुरुकुलले खेलको अन्तिम समयमा उत्कृष्ट पुनरागमन गर्दै नतिजा आफ्नो पक्षमा पारेर उपाधि हात पार्न सफल भएको हो । घोराही उपमहानगरपालिकाको वार्षिक कार्यक्रम अनुसार घोराही नगर खेलकुद विकास समितिको आयोजना तथा बास्केटबल संघ दाङको प्राविधिक सहयोेगमा भएको प्रतियोगिताको ईमर्जिङ खेलाडी गोरखा स्कुलका निश्चल खत्री र उत्कृष्ट खेलाडी गुरुकुल एकेडेमीका आदित्य थकाली घोषित भए ।

प्रतियोगिताका विजेता, उपविजेता तथा उत्कृष्ट खेलाडीलाई शिल्ड, मेडल र प्रमाण पत्र प्रदान गरिएको छ । मंसिर १३ गतेदेखि शुरु भएको प्रतियोगितामा ८ वटा टीमको सहभागीता रहेको थियो ।
नगर खेलकुद विकास समितिका अध्यक्ष नरेन्द्र पुनको अध्यक्षता तथा घोराही उपमहानगरपालिकाकी उपप्रमुख हुमा डिसीको प्रमुख आतिथ्य एवम् सामाजिक विकास महाशाखा प्रमुख नारायणप्रसाद पौडेलको विशिष्ट आतिथ्यमा प्रतियोगिताको समापन गरिएको थियो ।

समापनका अवसरमा प्रमुख अतिथि डिसीले खेल शारिरीक, मानसिक विकासका लागि प्रमुख आधार रहेको हुँदा विद्यालय स्तरमा यस प्रकारका प्रतियोगिता अत्यन्तै आवश्यक रहेको बताए । स्वस्थ नागरिक उत्पादनका लागि खेलकुदको भुमिका महत्वपूर्ण रहेको भन्दै खेलकुदका गतिविधि चलायमान बनाउन पालिकाले पूर्वाधार विकासमा ध्यान दिने बताए । कार्यक्रमको सहजीकरण खेलकुद विकास समितिका सदस्य श्रवणकुमार खनालले गरेका थिए