स्थानीय तह उपनिर्वाचन आज
काठमाडौँ,१६ मंसिर । जनप्रतिनिधिको मृत्यु वा राजीनामाका कारण रिक्त बनेका स्थानीय तहका पदमा आइतबार उपनिर्वाचन हुँदै छ । नगरपालिका प्रमुख १, उपप्रमुख १, गाउँपालिका अध्यक्ष २, उपाध्यक्ष ४ तथा वडाध्यक्ष ३३ गरी ४१ पदका लागि उपनिर्वाचन गरिएको हो ।
निर्वाचन आयोगका अनुसार उपनिर्वाचनमा २० राजनीतिक दलका र स्वतन्त्रसमेत गरेर ३ सय ७६ जना उम्मेदवार छन् । उपनिर्वाचन हुने स्थानीय तहमा २ लाख २६ हजार ७ सय ९९ मतदाता छन् । १ सय ६२ मतदानस्थलमा २ सय ९३ मतदान केन्द्र बनाइएको छ । मतदानका लागि आइतबार बिहान ७ बजेदेखि साँझ ५ बजेसम्म समय तोकिएको छ । मत हाल्न मतदाता परिचयपत्र लिएर मतदान केन्द्रमा पुग्नुपर्नेछ । मतदाता परिचयपत्र नरहे परिचय खुल्ने नागरिकता, राष्ट्रिय परिचयपत्र, सवारी चालक परिचयपत्र, राहदानी वा स्थायी लेखा नम्बर भएको परिचयपत्रका आधारमा मतदान गर्न मिल्ने आयोगले जनाएको छ ।
उपनिर्वाचनका लागि सबै तयारी पूरा भएको आयोगले जनाएको छ । मतदानको पूर्वसन्ध्यामा प्रेस विज्ञप्ति जारी गरेर आयोगले उपनिर्वाचन हुने क्षेत्रका मतदातालाई आफ्नो नाम रहेको मतदान केन्द्रमा उपस्थित भएर निर्धक्कसाथ मतदान गर्न आह्वान गरेको छ । यस पटक मतदानको दिन सवारीसाधन सञ्चालनमा रोक भने लगाइएको छैन ।
आयोगकी प्रवक्ता नीता पोखरेल अर्यालका अनुसार मतदानस्थलको निश्चित क्षेत्रबाहेक निर्वाचन सुरक्षामा असर नपर्ने गरी यातायात सञ्चालनको व्यवस्था मिलाउन आयोगले गृह मन्त्रालयमार्फत सम्बन्धित प्रमुख जिल्ला अधिकारी लाई निर्देश गरेको छ । मतदान सकिएलगत्तै प्रक्रिया पूरा गरेर मतगणना थालिने आयोगले जनाएको छ ।
स्थानीय तहको आधा कार्यकाल पूरा भएकै बेला हुँदै गरेको उपनिर्वाचनलाई दलहरूले ‘मध्यावधि परीक्षण’ का रूपमा हेरेका छन् ।उपनिर्वाचनअन्तर्गत रुकुमपूर्वको पृथा उत्तरगंगा–२ को वडाध्यक्षमा माओवादीका जगत घर्ती भने निर्विरोध निर्वाचित भइसकेका छन् । कैलालीको जिसस प्रमुखमा कांग्रेसका टीकाकुमारी चौधरी ९भुल० र ओखलढुंगा जिसस प्रमुखमा कांग्रेसकै टेकराज भट्टराई पनि निर्विरोध विजयी भएका छन् ।