घोराहीमा एकल र अशक्त महिलालाई १७ सय कुखुरा वितरण
दाङ, १५ माघ । घोराही उपमहानगरपालिकाले एकल र अशक्त महिलालाई आयआर्जनमा सहयोग पु¥याउने उद्देश्यले निःशुल्क कुखुरा वितरण गरेको छ । नगर क्षेत्रमा रहेका आर्थिक रूपमा अशक्त र एकल महिलालाई व्यवसायमा जोड्दै आयआर्जनमा वृद्धि गर्ने उद्देश्यले एक सय जना महिलालाई कुखुरा प्रदान गरेको हो ।
घोराही उपमहानगरपालिका कृषि तथा पशुपन्छी विकास शाखाले प्रतिव्यक्ति १७ वटा कुखुराका दरले सय जना महिलालाई एक हजार सात सय कुखुरा वितरण गरेको छ । कुखुरा प्राप्त गर्नेमा ११ जना अशक्त र ८९ जना एकल महिला रहेको घोराही उपमहानगरपालिका पशुपन्छी शाखा प्रमुख श्रीधर अधिकारीले जानकारी दिएका छन् । शाखा प्रमुख अधिकारीका अनुसार बाँकेको खजुराबाट उन्नत जातका न्यू हेम्पसायर र अस्ट्रोलोप जातका छ हप्ताका कुखुरा वितरण गरिएको बताए ।
मासु र अण्डा उत्पादनका माध्यमबाट महिलालाई आयआर्जनमा सहयोग गर्ने उद्देश्यले कुखुरा प्रदान गरिएको भन्दै शाखा प्रमुख अधिकारीले भने, ‘कुखुरा प्रदानले अशक्त र एकल महिलालाई आयआर्जनमा जोडिन सहयोग पुग्ने अपेक्षा छ ।’ शाखा प्रमुख अधिकारीका अनुसार वितरणका लागि चार लाख मूल्यको उन्नत जातका कुखुरा खरिद गरिएको थियो ।
सूचना प्रकाशित गरेर नगर क्षेत्रका विभिन्न वडाबाट आर्थिक रूपमा कमजोर अशक्त र एकल महिलालाई छनोट गरिएको बताए । उनका अनुसार सरकारले प्रदान गर्दै आएको सामाजिक सुरक्षा कार्डलाई आधारमा कुखुरा प्राप्त गर्ने महिलाहरू छनोट गरेको थियो । एकल र अशक्त महिलालाई स्थानीय सरकारको आवास दिलाउने उद्देश्यले घोराही नगर क्षेत्रमा रहेका महिलाहरू छनोट गरेर कुखुरा प्रदान गरिएको घोराही उपमहानगरपालिका वडा नं. ७ का वडाध्यक्ष खोपीराम चौधरीले बताएका छन् । वडाध्यक्ष चौधरीले कुखुरा वितरण हेर्दा सानो सहयोग देखिने भए पनि राम्रोसँग पाल्न सके आयआर्जनमा ठुलो सहयोग पुग्ने बताए ।
एकल तथा अशक्त महिलालाई घोराही उपमहानगरपालिका आर्थिक विकास समिति संयोजक तथा वडा नं. ७ का वडाध्यक्ष चौधरी र कृषि तथा पशुपन्छी विकास शाखा प्रमुख अधिकारीले संयुक्त रूपमा कुखुरा वितरण गरेका थिए । एकल र अशक्त महिलालाई जस्तै घोराही उपमहानगरपालिकाले आयआर्जनमा सहयोग गर्ने उद्देश्यले मुक्त कमलरीहरूलाई पनि कुखुरा वितरण गर्ने बताएको छ ।