ग्रामीणद्वारा मुक्त कमैया शिविरमा बस्दै आएकालाई ५० थान फाइबर सिरक सहयोग
घोराही, १५ माघ । ग्रामीण महिला उत्थान केन्द्र दाङले मुक्त कमैया शिविरमा बस्दै आएकाहरुलाई फाइबर सिरक हस्तान्तरण गरेको छ । केन्द्रले मंगलबार घोराही उपमहानगरपालिका वडा नम्बर १६ स्यानी अम्बापुरस्थित मुक्त कमैया शिविरमा बस्दै आएकाहरुलाई ५० थान फाइबर सिरक सहयोग हस्तान्तरण गरेको हो ।
थोक कर्जा दिने फस्र्ट माईक्रोफाईनान्स लघुवित्त वित्तिय संस्था लिमिटेड, ज्ञानेश्वर काठमाडौको सामाजिक उत्तरदायित्व अन्तरगत ग्रामीण महिला उत्थान केन्द्रको समन्वयमा आत्मनिर्भर लघुवित्त वित्तिय संस्था लिमिटेडमा आवद्ध शिविर महिला उत्थान केन्द्रका ५० जना महिलालाई फाईबर सिरक हस्तान्तरण गरिएको हो ।
शिविर महिला उत्थान केन्द्र प्रमुख सन्तोली चौधरीको अध्यक्षता तथा ग्रामीण महिला उत्थान केन्द्रकी अध्यक्ष आसमानी चौधरी प्रमुख आतिथ्य एवम् आत्मनिर्भर लघुवित्त वित्तिय संस्था लिमिटेडका प्रमुख कार्यकारी अधिकृत सोगतबीर चौधरीको विशिष्ट आतिथ्यमा आयोजित कार्यक्रममा लाभग्राहीले आफुहरुको जीवनस्तर सुधारमा ग्रामीण महिला उत्थान केन्द्रमा ठूलो योगदान दिएको बताउनुभयो ।
लाभग्राही साबी चौधरीले संस्थाले शुरुवाती समयदेखि नै आयआर्जनका क्रियाकलापमा जोडिनुपर्छ भनेर काम गर्ने बाटो देखाएको बताउनुभयो । साक्षर बनाउने, उद्यममा जोड्ने, आयआर्जनमा लाग्ने काममा ग्रामीणले धेरै राम्रा काम गरेको भन्दै उहाँले संस्था एक अभिभावकका रुपमा रहेको बताउनुभयो ।
यसैगरी, शिविर महिला उत्थान केन्द्र प्रमुख सन्तोली चौधरीले हिजो साउने झरीमा शिविरमा बस्न आउँदा टहराको बासबाट सुरक्षित घरमा बस्ने अवस्थासम्म ल्याउने काममा ग्रामीण महिला उत्थान केन्द्रले बलियो साथ दिएको बताउनुभयो । खानेपानी, उद्यम, आयोआर्जनका क्षेत्रमा गरेको योदानले अहिले यो अवस्थामा पुगेको भन्दै उहाँले अझै पनि जीवन सुधारका लागि साथ चाहिएको बताउनुभयो ।
सो अवसरमा, प्रमुख अतिथि आसमनी चौधरीले संस्था र सरोकार समुदाय बीचको सम्बन्ध नङ र मासुको जस्तै रहेको भन्दै अहिले धेरै जना व्यापार, व्यवसाय, कृषि, बाख्रापालन लगायत पेशामा आवद्ध भएर आत्मनिर्भर भई अघि बढेको देख्दा खुसी लागेको बताउनुभयो ।
पहिलेको अवस्थाबाट अहिलेको अवस्थामा ल्याउन संस्थाले गरेको लगानी सही ठाउँमा भएको भन्दै यसले आफुहरुमा उत्साह थपेको बताउनुभयो । सामाजिक न्याय, आर्थिक तथा मानवीय विकासका पक्षमा संस्था सदैव साथमा रहेको उहाँले बताउनुभयो । बिपन्न, असहाय, सीमान्तकृत समुदायको जीवन सुधारका लागि काम गर्न संस्था हरदम प्रतिवद्ध रहेको जानकारी गराउँदै संस्थाले गरेको विश्वासलाई आत्मसात गरेर समुदायले पनि काम गरेको देख्दा उत्साह थप्ने काम गरेको बताउनुभयो । उहाँले आगामी दिनमा बालबालिकाहरुलाई छात्रबृत्ति प्रदान गर्ने जानकारी गराउँदै समुहसँग ग्रामीण महिला उत्थान केन्द्र साथ रहने प्रतिबद्धता व्यक्त गर्नुभयो ।
कार्यक्रमका विशिष्ट अतिथि सोगतबीर चौधरीले आत्मनिर्भर हुन आर्थिक पक्ष बलियो जरुरी रहेपनि मानिसमा इमान्दारिता सबैभन्दा ठूलो कुरा रहेको बताउनुभयो । उहाँले आत्मनिर्भर लघुवित्तमार्फत समुह जमानीका आधारमा गरिएको कर्जा लगानलिे आयआर्जनमा जोडिएर अहिले धेरैले आफ्नो जीवन उकासेको देख्दा निकै खुशी लागेको बताउनुभयो । उहाँले गरिवनी निवारण गर्न र नागरिकलाई उद्यमी बनाउन, चुलोचौकाबाट बाहिर ल्याउन, बुहार्तनबाट उद्यमी बनाउने अभियानले अहिले धेरैको जीवन सुधार भएको बताउनुभयो । हिजोका दिनमा कमैया कमलरी हुँदा अरुको जीवन बनाउन तल्लीन भएकाहरु अहिले संस्थामा जोडिएर आफ्नो जीवन बनाउन लागेको देख्दा संस्थाले लिएको परिकल्पना सार्थक भईरहेको बताउनुभयो ।
सहयोग हस्तान्तरण कार्यक्रममा ग्रामीण महिला उत्थान केन्द्र संचालक समितिका माधवा पोख्रेल, कमला चौधरी, आत्मनिर्भर लघुवित्तका आन्तरिक लेखा परिक्षक निर्मल चौधरी, घोराही शाखा प्रबन्धक तिर्सना चौधरी, ग्रामीण महिला उत्थान केन्दका एचबी थापालगायत सहभागी हुनुहुन्थ्यो ।
सहभागीलाई स्वागत तथा कार्यक्रमको उद्देश्यबारे कर्जा विभाग प्रमुख सुशीला गिरीले जानकारी गराउनुभएको थियो भने सहजीकरण ग्रामीण महिला उत्थान केन्द्रकी पार्वती बस्नेतले गर्नुभएको थियो ।