धर्म र मर्मले मानव सेवामा जुट्न प्रदेश प्रमुखको आग्रह
घोराही, १७ माघ ।
संसार, समाज संकटमा छ । सक्नेले सेवा गरौ ।
जन्तु जगतमा मान्छे विकसित जन्तु हो ।
सबैलाई मानवीय सेवाले धर्म गरौँ ।
अलपत्र बेवारिसे भा हुन वा बनाईयो ।
मर्मले मानवता बुझौँ । धर्मले सेवा गरौँ । मर्मले सेवा गरौँ ।
सडक मानवहरुका लागि सहयोगार्थ मानव कल्याण समाज दाङ शाखाको आयोजनामा घोराहीमा बिहीबारदेखि शुरु भएको ‘श्रीमद्भागवत सप्ताह ज्ञान विज्ञान महायज्ञ २०८१’ लाई उदघाटन गर्दै लुम्बिनी प्रदेश प्रमुख कृष्णबहादुर घर्ती मगरले अघिव्यक्त गर्नुभएको यी शब्द हुन् ।
धन हुनेले धनले, मन हुनेले मनले मानवको सेवा गर्न सके समाज आफै सभ्य अनि भव्य हुने उहाँको भनाई थियो । कार्यक्रमका प्रमुख अतिथिसमेत रहनुभएका प्रदेश प्रमुख घर्ती मगरले देश विकासको आधार पूर्वाधार मात्रै नहुने भन्दै मानवताको कार्यमा जुट्न सबैलाई आग्रह गर्नुभयो । बेसाहाराको सहारा बनेको मानव सेवाघरको पवित्र अभियानमा सबै एकजुट हुनुपर्ने बेला भएको बताउनुभयो । धन हुनेले मन पनि फुकाएर मानवीयता देखाउन उहाँले सबैमा अपिल गर्नुभयो ।
महायज्ञ मूल आयोजक समिति संयोजक चन्द्रराज पन्तको अध्यक्षतामा भएको उदघाटन समारोहमा प्रदेश प्रमुख घर्ती मगरले महंगा होटलमा महंगा भोग बिलास गर्नेहरुले मानव सेवाको कार्यमा खर्च गर्न सके सबैको उद्धार हुने बताउनुभयो ।
उहाँले अस्थायी बसोबासको दीगोपनका लागि सोच्न पनि घोराही उपमहानगरपालिकालाई अपिल गर्नुभयो । नारायणपुरमा रहेका सेवाघर अहिले काम चलाउ रहेको भन्दै दीगो बनाउन ध्यान दिन सचेत गराउनुभयो ।
प्रदेश प्रमुख घर्ती मगरले मानव कल्याण समाजले बेवारिसे एवं मानसिक समस्या भएका मानिसहरुलाई सेवा घरमा राखेर सेवा दिएकोमा धन्यवाद पनि दिनुभयो । सेवा घर नारायणपुरका अवलोकन गरेको बताउदै उहाँले सरकारले गर्नुपर्ने काम एक सामाजिक संस्थाले गरिरहेकोमा अभियानलाई सरकारले पनि साथ र सहयोग गर्नुपर्नेमा जोड दिनुभयो । उहाँले तीन तहका सरकारले यो विषयलाई गम्भीर रुपमा लिएर अगाडी बढ्न अपिल गर्दै जनताको सबैभन्दा नजिक रहेको स्थानीय सरकारले सामाजिक विषयलाई अझ बढी ध्यान दिएर काम गर्न आवश्यक रहेको बताउनुभयो । सडक बनाउने काम हुँदै जाने बताउँदै उहाँले पहिले मानव बनाउने विषयमा सबैको ध्यान जानुपर्ने आवश्यकता औँल्याउनुभयो । उहाँले सबैमा मन, वचन र कर्मले महायज्ञलाई सहयोग गर्न अनुरोध गर्नुभयो ।
लुम्बिनी प्रदेश उर्जा, जलस्रोत तथा सिंचाइ मन्त्री सीता शर्मा चौधरीले सबैले सहयोग गरेर मानवताको कार्यमा जुट्न अपिल गर्नुभयो । बेसाहाराको सहारा बनेर मानव कार्यमा जुटेको संस्थाले समाजको सच्चा अभिभावक बनेर देखाईरहेको बताउनुभयो । उहाँले सेवाघरमा बस्दै आएकाहरुको बसाइँ थप व्यवस्थित र दिगो बनाउन स्थायी आवासका लागि लुम्बिनी सरकारको तर्फबाट भवन निर्माणका लागि आवश्यक बजेट विनियोजनमा सघाउने प्रतिवद्धता जनाउनुभयो ।
यसैगरी, जिल्ला समन्वय समिति दाङका प्रमुख नित्यानन्द शर्माले हरेक नागरिकलाई आत्मबोध गराउन मानव कल्याण समाज सेवाघरको अभियानमा सबै जोडिनुपर्ने बताउनुभयो ।
घोराही उपमहानगरपालिकाका नगर प्रमुख नरुलाल चौधरीले सरकारसँगको सहकार्यमा गरिएको कामले घोराहीलाई सडक मानवमुक्त बनाउन सम्भव भएको बताउनुभयो । समस्याको रुपमा रहेको सडक मानव मुक्त बनाउने काममा संस्थाले ठूलो योगदान दिएको भन्दै देशबाट सडक मानवमुक्त बनाउने अभियानमा जुट्नु अहिलेको आवश्यकता रहेको बताउनुभयो ।
उहाँले हरेक वर्ष मानव कल्याण समाज सेवाघरमा बस्दै आएकाहरुका लागि बजेट विनियोजन गर्दै आएको बताउनुभयो । उहाँले पहिलो वर्ष ३ लाख, दोस्रो वर्ष ५ लाख, तेस्रो र चौथो वर्ष ८–८ लाख र यो वर्ष १० लाख रुपैयाँ विनियोजन भएको बताउनुभयो । पालिकाले गर्दै आएको सहयोग पर्याप्त भने नरहेको उहाँले बताउनुभयो ।
भोको मर्न नदिने अठोटका साथ पालिकाले अनाथ बालबालिकालाई उद्धार गरी अहिले शान्ति बालगृहमा व्यवस्थापन गरेको भन्दै यसका लागि पनि १४ लाख विनियोजन भएको बताउनुभयो ।
सार्वजनिक चौपायालाई सडकबाट उठाएर चाक्लीघाटमा लगिएको भन्दै उहाँले सरकारले मात्रै नसक्दा सबैको जिम्मेवारी होस् भन्ने लक्ष्यका साथ थालनी भएको महायज्ञले हरेक नागरिकलाई जिम्मेवार बनाउन सघाउने विश्वास व्यक्त गर्नुभयो । यो महायज्ञले मानसिक, शारीरिक स्वास्थ्य सुधारमा काम गर्न सघाउने बताउनुभयो ।
प्रमुख जिल्ला अधिकारी कृष्णप्रसादले समाज विकासका कार्यक्रममा स्थानीय सरकारले ध्यान दिनुपर्ने बताउँदै बजेट बढोत्तरी गर्न अपिल गर्नुभयो ।
सो अवसरमा, नेकपा माओवादी दाङका ईन्चार्ज निर्मल आचार्य, नेकपा एमालेका केन्द्रीय सदस्य जीवन गौतम, नेपाली कांग्रेस लुम्बिनी प्रदेश उपसभापति खगराज पाण्डे, नेपाल पत्रकार महासंघका निवर्तमान अध्यक्ष विपुल पोख्रेल, नेपाल पत्रकार महासंघका केन्द्रीय सचिव सविन प्रियासन, सर्वाेदय पुस्तकालय तथा वाचनालयका अध्यक्ष सुशील गौतमलगायत बोल्नुभएको थियो ।
घोराही उपमहानगरपालिका वडा नम्बर. १० मा रहेको मानव कल्याण समाजले सञ्चालन गरेको सेवा घरमा रहेका बेवारिसे मानवहरुको सहयोगार्थ महायज्ञबाट संकलित रकमको अक्षयकोष स्थापना गरी त्यसबाट आउने रकमले सेवाघरमा बस्दै आएकाहरुको जीवनयापनमा खर्च गरिने भएको छ । आगामी माघ २४ गतेसम्म कर्मचारी मिलन केन्द्रमा हुने महायज्ञमा प्रमुख कथावाचकका रुपमा मानव कल्याण समाजकी संस्थापक अध्यक्ष सुमी मानव रहनुभएको छ ।
उदघाटन समारोह अघि महायज्ञ स्थलबाट सुरु भएको शोभा कलाश यात्रा जिल्ला अदालत, परिवार नियोजन हुँदै भानुचोक, दामोदरचोक, बैंक रोड, निमाहल रोड, ट्राफिक चोक, विपी चोक, सहिद गेट हँुदै महायज्ञ स्थलमा पुगेको थियो । शोभाकलश यात्रालाई विभिन्न टोल विकास सस्ंथा तथा व्यवसायीहरुले कलश राखेर एवं फूलमालाले स्वागत गरेका थिए । महायज्ञमा दैनिक प्रवचनसहित विभिन्न कर्मसमेत गरिनेछ ।