चौथो खुमबहादुर खड्का स्मृति भलिबलको फाईनलमा न्यु होराईजन र मणिमुकुन्द भलिबल क्लब
घोराही, २३ फागुन । दाङको घोराहीमा चौथो खुमबहादुर खड्का स्मृति लुम्बिनी प्रदेशस्तरीय खुला पुरुष भलिबल प्रतियोगिताको फाईनलमा रुपन्देहीको न्यु होराईजन र मणिमुकुन्द भलिबल क्लब प्रवेश गरेका छन् ।
खुमबहादुर खड्का समाज विकास समिति दाङको आयोजनामा जारी प्रतियोगितामा शुक्रबार सम्पन्न सेमीफाइनल खेल सकिएसँगै उपाधिका लागि दुई टीम भिड्ने भएका हुन् ।
जिल्ला समन्वय समिति घोराहीको मञ्चमा भएको पहिलो सेमीफाईनल खेलमा न्यु होराईजन स्पोर्टस क्लबले रोयल सिस्ने स्पोर्ट्स क्लबलाई ३–१ को सेटमा हरायो ।
न्यु होराईजन स्पोर्टस क्लबले २५–२४, २३–२५, २५–१९ र २५–२० अंकका साथ फाइनलमा स्थान सुरक्षित गरेको हो । यसैगरी, दोस्रो सेमीफाईनलमा मणिमुकुन्द भलिबल क्लबले वली बंशावली समाज (चित्रालेखी) लाई ३–० को सोझो सेटमा हराउँदै उपाधि नजिक पुगेको छ । मणिमुकुन्द भलिबल क्लबले बंशावली समाज (चित्रालेखी) लाई २५–१९, २५–१८ र २५–१८ को सोझो सेटमा पराजित गर्दै उपाधि नजिक पुगेको हो ।
अब शनिबार बिहान ९ बजे तेस्रो स्थानका लागि बंशावली समाज (चित्रालेखी) र रोयल सिस्ने स्पोर्ट्स बिच खेल हुनेछ भने फाईनल खेल दिउँसो २ बजेपछि न्यु होराईजन स्पोर्टस क्लब र न्यु होराईजन बीच हुने नेपाली कांग्रेस दाङका सहसचिव एवं खुमबहादुर खड्का समाज विकास समितिका संयोजक राजु आचार्यले जानकारी दिनुभयो ।
प्रतियोगितामा प्रथम हुने टीमले नगद दुई लाख ५१ हजार रुपैयाँसहित शिल्ड, मेडल र प्रमाणपत्र प्राप्त गर्नेछ । दोस्रो हुने टीमले नगद एक लाख २५ हजार तथा तेस्रो हुने टीमले नगद ५० हजारसहित शिल्ड, मेडल र प्रमाणपत्र प्राप्त गर्ने आयोजकले जनाएको छ ।
फागुन २० गतेबाट शुरु भएको प्रतियोगितामा लुम्बिनी प्रदेशका ८ टीमले सहभागीता जनाएका हुन् । लिग चरणमा खेलाईएको प्रतियोगितामा राष्ट्रिय प्रतियोगिता खेलीसकेका खेलाडीको समेत सहभागीता रहेको छ ।