धारापानी मेलाबाट करिब आठ लाख आम्दानी
विमल योगी
दाङ, २४ फागुन । धारापानीमा सञ्चालन भएको महाशिवरात्री मेलामा करिब आठ लाख रुपैयाँ आम्दानी भएको छ । फागुन १२, १३ र १४ गते सञ्चालन भएको मेलामा सात लाख ७३ हजार २० रुपैयाँ आम्दानी भएको हो ।
घोराही उपमहानगरपालिका वडा नम्बर ५ धारापानी स्थित पाण्डवेश्वर महादेव मन्दिर धाममा सञ्चालन भएको मेलामा दुई लाख ६९ हजार सात सय ८० रुपैयाँ खर्च भई पाँच लाख तीन हजार दुई सय ४० रुपैयाँ बचत भएको समितिका सचिव विष्णुराम आचार्यले जानकारी दिए । समितिका अध्यक्ष गणेशकुमार अधिकारीको अध्यक्षतामा शुक्रवार सम्पन्न बैठकमा मेलाबाट सङ्कलन भएको आम्दानी तथा खर्च विवरण सार्वजनिक गरिएको हो ।
मेलामा सबैभन्दा बढी दानपेटिकाबाट दुई लाख ९२ हजार, नगदी सहयोगबाट दुई लाख १२ हजार ६०, बजार मेलाबाट एक लाख ९३ हजार र पार्किङ शुल्कबाट ७५ हजार नौ सय ६० रुपैयाँ आम्दानी भएको छ । बैठकले यस वर्षको महाशिवरात्री मेला व्यवस्थित र भव्य रूपमा समपन्न भएको जनाएको छ ।
मेलामा सहयोग गर्ने लुम्बिनी प्रदेशका मुख्यमन्त्री, राजनीतिक दल, भक्तजन, सुरक्षाकर्मी, विभिन्न धार्मिक संस्था, सरकारी तथा गैरसरकारी संघसंस्था, उद्योगी व्यवसायी, पत्रकार, नागरिक समाज, मेला व्यवस्थापन उपसमिति, स्थानीय व्यापारी तथा कर्मचारीलगायत सबैमा धन्यवाद ज्ञापन गरेको छ ।
मेलाको पहिलो दिन १० गौभुखीधाराको उद्घाटन, दोस्रो दिन बेलुका एक हजार आठवटा दीप प्रज्वलन र १४ गते विधिपूर्वक भगवान शिवको पूजाआराधना गरी लुम्बिनी प्रदेशका मुख्यमन्त्री चेतनारायण आचार्यको उपस्थितिमा नेपाली सेनालगायतका सुरक्षाकमी, मन्दिर व्यवस्थापन समिति, भक्तजनलगायतको सहभागितामा शिव सलामी दिइएको थियो ।