महिला जेसीजद्वारा कानून बारे सचेतनामूलक तालिम
घोराही, २४ फागुन । दाङ महिला जेसीजले ११५औँ अन्तर्राष्ट्रिय श्रमिक महिला दिवसको सन्दर्भमा कानूनमा महिलाका सवाल बारे महिलाहरुलाई सचेतनामूलक तालिम प्रदान गरेको छ ।
महिला जेसीज वर्ष २०२५ की अध्यक्ष अनिता ढकालको अध्यक्षता तथा घोराही १४ का कार्यवाहक अध्यक्ष रचना कुमालको प्रमुख आतिथ्यमा शनिबार खोलीगाउँमा बस्दै आएका महिलाहरुलाई कानूनी सचेतना प्रदान गरिएको हो ।
प्रमुख अतिथि कुमालले समुदाय स्तरमा कानूनी साक्षरता प्रदान गर्ने काम सराहनीय रहेको बताउनुभयो । स्थानीय सरकारसँगको सहकार्यमा सामाजिक संघ संस्थाले गरिरहेको प्रयासले समाजमा सचेतना फैलाउन सहयोग पुगेको उहाँले बताउनुभयो । ३० बढी महिलालाई प्रशिक्षण प्रदान गर्नुभएकी प्रशिक्षक साजिदा सिद्धिकीले संविधानमा महिलाका अधिकार सुनिश्चित गरिए पनि कार्यान्वयनमा महिलाहरुको पहुँच बढाउन जरुरी रहेको बताउनुभयो ।
कानूनमा भएका कुरालाई महिलाले बुझ्न आवश्यक रहेको भन्दै महिला सशक्तीकरणका सवालमा विश्वमा भएका प्रयास, नेपालमा महिलाको राजनीतिक, सामाजिक, आर्थिक क्षेत्रमा निर्दिष्ट कानून र यसको कार्यान्वयन तथा उपलब्धि लगायत विषयमा उहाँले प्रशिक्षण गर्नु भएको थियो ।
समता, समानता र क्षमतामा पहुँच पुर्याउन महिलाहरु जागरुक बन्न कानूनी सचेतना फैलाउने प्रयास गरिएको भन्दै नेपालको संविधानमा महिलाका पक्षमा उल्लेख भएका विषय, ऐन, कानून बारे जानकारी गराउनुभएको थियो ।
सो अवसरमा, महिला जेसीज पूर्वअध्यक्ष जीवा भुसालले परिवर्तनका सम्वाहक बन्न महिला जागरुक हुनुपर्ने बताउनुभयो । उहाँले एकले अर्काेलाई सहयोग गर्दै मिलेर अघि बढ्दा सबैको हीत हुने बताउनुभयो । नारी मिले समाज मिल्ने र समाज मिले सबैको हीत हुने उहाँको भनाई थियो ।
मातृ शाखा त्रिभुवननगर जेसीजका अध्यक्ष टंकबहादुर रावत अनन्तले नारी सशक्तीकरणका लागि कानूनी सचेतना जरुरी रहेको बताउनुभयो । नारी सक्षमताका लागि महिला जेसीजले बस्ती स्तरमा गरिएको कामले समाजमा सकारात्मक प्रभाव परिरहेको बताउनुभयो ।
तालिम निर्देशक तथा कार्यक्रम संयोजक आराधना सिंह ठकुरीको स्वागत मन्तव्यबाट शुरु भएको कार्यक्रममा सहभागीलाई तथा आस्थापाठ सदस्य सरस्वती वली केसीले गराउनुभएको थियो । कार्यकारिणी उपाध्यक्ष लक्ष्मी चौधरीले धन्यवाद ज्ञापन गरेको कार्यक्रमको सहजीकरण महासचिव भीमा डिसीले गर्नुभएको थियो ।