चौथो खुमबहादुर खड्का स्मृति भलिबलको मणिमुकुन्दलाई उपाधि
दाङ,२४ फागुन । चौथो खुमबहादुर खड्का स्मृति लुम्बिनी प्रदेशस्तरीय खुला पुरुष भलिबल प्रतियोगिताको उपाधि मणिमुकुन्द भलिबल क्लब रुपन्देहीले जितेको छ ।
दाङको घोराहीमा शनिबार भएको फाइनल खेलमा न्यु होराइजन स्पोट्र्स क्लब बुटवललाई १ का विरुद्ध ३ सेटले हराउँदै बिजयी भएको हो । कडा प्रतिष्पर्धात्मक खेलमा मणिमुकुन्द भलिबल क्लबले २५–१४, २७–२९, २५–१९ र २५–२० को सेटमा जित निकाल्दै प्रतियोगिताको उपाधि हात पारेको हो । उपाधिसँगै मणिमुकुन्दले नगद दुई लाख ५१ हजारसहित ट्रफी, मेडल र प्रमाणपत्र जित्न सफल भएको छ ।
प्रतियोगितामा उपबिजेता बनेको न्यू होराईजन क्लवले नगद एक लाख २५ हजारसहित ट्रफी, मेडल र प्रमाणपत्र प्राप्त गरेको छ । उल्लेख्य दर्शकले मैदान भरिभराउ भएको फाइनल खेलको पहिलो सेट २५–१४ ले मणिमुकुन्दले जित्दा दोस्रो सेट २७–२९ ले न्यु होराइजन स्पोट्र्स क्लबले जितेको थियो । त्यसपछि लगातार दुई सेट २५–१९ र २५–२० को सेटमा जित निकाल्दै प्रतियोगिताको उपाधि मणिमुकुन्दले आफ्नो कब्जामा पार्न सफल भएको थियो ।
प्रतियोगितामा रोयल सिस्ने युवा क्लव तेस्रो भएको छ । ओली बंशावली समाज दाङलाई सोझो ३–० को सेटमा हराउँदै तेश्रो बनेको रोयल सिस्ने युवा क्लवले नगद ५० हजारसहित ट्रफी, मेडल र प्रमाणपत्र प्राप्त गरेको थियो । चार दिनसम्म घोराहीस्थीत सहिद मञ्चमा भएको प्रतियोगितामा उत्कृष्ट खेलाडीका रुपमा मणिमुकुन्द भलिबल क्लबका खेलाडी रेशम छन्त्याल, उत्कृष्ठ बलकरमा मणिमुकुन्दकै खेलाडी चिरण खड्का, उत्कृष्ट स्पाइक मणिमुकुन्दकै रेशम विक, उत्कृष्ट सर्वर न्यू होराइजनका बिष्णु बस्नेत, उत्कृटर डिफेन्डर होराइजनका तुल्सीराम बाग्चाल, उत्कृष्ट सेटरका रुपमा मणिमुकुन्दका दिपेन्द्र कुँवर र उत्कृष्ट कोचका रुपमा मणिमुकुन्दकै पवन थापा पुरस्कृत भएका थिए ।
नेपाली कांग्रेस दाङका सहसचिव एवं खुमबहादुर खड्का समाज विकास समितिका संयोजक राजु आचार्यको सभापतित्वमा भएको समापन कार्यक्रममा बिजेतालाई नेपाली कांग्रेसका केन्द्रीय सहमहामन्त्री भीष्मराज आङदाङ्म्बे,नेपाली कांग्रेसका केन्द्रीय सदस्य कृष्णकिशोर घिमिरे, नेपाली कांग्रेसका लुम्बिनी प्रदेश उपसभापति राजु खनाल, सहमहामन्त्री खगराज पाण्डेय, नेपाली कांग्रेस दाङका सभापति शंकरप्रसाद डाँगी, नेपाली कांग्रेस दाङका पूर्व जिल्ला सभापति विरकेशरी गौतम,लुम्बिनी प्रदेशसभा सदस्य अनुराग खड्कालगायतले बिजेता खेलाडीलाई प्रमाणपत्र ट्रफी, मेडल र प्रमाणपत्र प्रदान गरेका थिए । प्रतियोगितामा लुम्बिनी प्रदेशका आठ टिमको सहभागिता रहेको थियो ।
जिल्लामा खेलकुद क्षेत्रको विकास र नयाँ प्रतिभावान खेलाडी उत्पादन गर्ने उद्देश्ययले नेपाली कांग्रेस दाङ खुमबहादुर खड्का विकास समाज समितिले प्रत्येक बर्ष प्रतियोगिता आयोजना गर्दै आएको छ । प्रतियोगिता फागुनको २० गतेदेखि सञ्चालन भएको थियो ।