प्रधानमन्त्री कप क्रिकेट प्रतियोगिता आजदेखि
दाङ, २५ फागुन । प्रधानमन्त्री कप एक दिवसीय पुरुष राष्ट्रिय क्रिकेट प्रतियोगिता आज (आइतवार)देखि सुरु हुँदैछ । प्रतियोगिता लमहीमा रहेको देउखुरी अन्तर्राष्ट्रिय क्रिकेट मैदान, सिद्धार्थ रंगशाला र तिलोत्तमा एक्स्ट्राटेक ओभल मैदान गरी देशको तीन ठाउँमा आजदेखि एकैपटक सञ्चालन हुन लागेको हो ।
प्रतियोगितामा सात प्रदेश तथा तीन विभागीय गरी १० टोलीको सहभागिता रहने छ । राष्ट्रिय खेलकुद परिषद्को आर्थिक सहयोगमा क्यानले प्रधानमन्त्री कप पुरुष क्रिकेट प्रतियोगिता आयोजना गरेको हो । यस अघि प्रधानमन्त्री कप महिला राष्ट्रिय क्रिकेट प्रतियोगिता दाङको लमहीमा सम्पन्न भइसकेको छ । लमहीको लागि यो प्रतियोगिता हालसम्मकै सबैभन्दा ठुलो प्रतियोगिता हो ।
देउखुरी क्रिकेट मैदानमा ४७ खेलमध्ये १४ खेल देउखुरी क्रिकेट मैदानमा हुने नेपाल क्रिकेट संघ लुम्बिनी प्रदेशका सचिव कैलाश रोका मगरले बताए । नेपाल क्रिक्रेट संघ लुम्बिनी प्रदेशका अध्यक्ष संजय गुरुङले प्रतियोगिता भव्य र व्यवस्थित बनाउन सबै तयारी पूरा भएको बताए । स्थानीय निकाय, खेलप्रेमी तथा विभिन्न संघसंस्थाको सहयोगबाट खेलाडी र दर्शकलाई उत्कृष्ट वातावरण प्रदान गरी क्रिक्रेट प्रतियोगितालाई सफल पार्ने लक्ष्य लिएको उनले बताए ।
गुरुङले खेलाडीलाई दक्ष बनाउन र प्रतिस्पर्धामा ल्याउन नेपाल क्रिकेट संघ (क्यान)को आयोजनामा नेपालमा प्रधानमन्त्री कप एकदिवसीय पुरुष राष्ट्रिय क्रिकेट प्रतियोगिता हुन लागेको हो । रातो बलमा खेलिने प्रधानमन्त्री कप एकदिवसीय पुरुष राष्ट्रिय क्रिकेट प्रतियोगिता ५० ओभरको हुनेछ ।
प्रदेशमा पछिल्लो समय क्रिकेट खेलप्रतिको क्रेज बढ्दै गएको उल्लेख गर्दै सोही अनुसार खेलाडी उत्पादन गर्न संघले ध्यान दिनुपर्ने क्यानका प्रदेश सचिव कैलाश रोकाले बताए । ‘संघ प्रदेश, स्थानीय सरकारले खेलकुद विकासमा धेरै कुराको व्यवस्थापन गरेको छ, जिल्लाबाट राष्ट्रिय तथा अन्तर्राष्ट्रिय स्तरमा खेल्नसक्ने धेरै खेलाडी उत्पादन गर्नुपर्छ’, रोकाले भने, ‘सरकारको तर्फबाट खेल विकासको लागि लागिरहेको र जिल्ला क्रिकेट संघ पनि सोही अनुसार लाग्नुपर्छ ।’
क्रिकेट खेल नेपाललाई चिनाउने लयमा अगाडि बढेकाले जिल्लामा खेलाडी उत्पादन तथा क्रिकेट खेललाई विकास गर्न सबैले हातेमालो गर्नुपर्ने नेपाल क्रिक्रेट संघ दाङ जिल्ला अध्यक्ष प्रदीप मजगैयाँको भनाइ छ । शून्य अवस्थाबाट पछिल्लो समय क्रिकेट खेलमार्फत् देउखुरीलाई चिनाउन नेपाल क्रिकेट संघ केन्द्रले विभिन्न गतिविधि सञ्चालन गर्न थालेको भन्दै नेपाल क्रिक्रेट संघ दाङ जिल्ला उपाध्यक्ष किशोर घर्ती मगरले खुसी व्यक्त गरे । क्रिकेट खेलको महत्व बढ्दै गएपछि राज्यका निकायले हेर्ने नजर समेत परिवर्तन भएको उनले बताए ।
प्रधानमन्त्री कप क्रिकेट प्रतियोगिता चैत १६ गतेसम्म चल्नेछ । लुम्बिनी प्रदेशका तीन मैदानमा हुने प्रतियोगिता राउन्ड रोबिन लिगमा हुनेछ । प्रतियोगितामा नेपाल पुलिस, त्रिभुवन आर्मी, नेपाल एपिएफसहित सात प्रदेशका टोलीको सहभागिता रहेको छ । सिद्धार्थ रङ्गशाला रुपन्देहीमा फाइनलसहित प्रतियोगितामा १७ खेल हुनेछन् । एक्स्ट्राटेक ओभल रुपन्देहीमा १५ खेल हुनेछन् । यसैगरी दाङको लमहीमा १४ खेल हुनेछन् । पहिलो दिन सिद्धार्थ रङ्गशालामा कोशी र लुम्बिनी प्रदेश भिड्नेछन् । यसैगरी एक्स्ट्राटेकमा बागमती प्रदेश र एपिएफ तथा लमहीमा कर्णाली र सुदूरपश्चिमबिच पहिलो प्रतियोगिता हुनेछ । प्रधानमन्त्री कपको अघिल्लो संस्करण सिद्धार्थ रङ्गशालासहित मुलपानी र कीर्तिपुर मैदानमा भएका थिए । यसपटक भने सबै खेल काठमाडौं बाहिर आयोजना गरिएको हो ।
लुम्बिनी प्रदेशमामा देव खनालको नेतृत्व
प्रधानमन्त्री कप राष्ट्रिय क्रिकेट प्रतियोगितामा लुम्बिनी प्रदेशको टिमको नेतृत्व देव खनालले गर्नेछन् । लुम्बिनी प्रदेश क्रिकेट संघले शुक्रवार देवको कप्तानीमा १५ सदस्यीय टोलीको घोषणा गरेको हो ।
संघका सचिव मगरका अनुसार नेपाली अन्डर–१९ का कप्तान समेत रहेका देवको कप्तानीमा १५ सदस्यीय टोलीको घोषणा गरिएको छ । टिममा आकाश त्रिपाठी, मित्रलाल गुरुङ, प्रज्वल थापा, मनिश थापा, सम्राट भुसाल, सुशान्तसिंह थापा, नरबहादुर सार्की, वीरबहादुर घर्ती, रमेश कुर्मी, निर्मल गुरुङ, अजय चौहान, कृष्ण कार्की, सल्लाउदिन खान र विपर्शन केसी रहेका छन् ।
अतिरिक्त खेलाडीमा तुलबहादुर थापा, राजेन्द्र बम, रौनक श्रीवास्तव, दिनेश बोहोरा र मो हुसेन छनोट भएको सचिव रोकाले जानकारी दिएका छन् । टिमको प्रशिक्षकमा वसन्त शाही, टिम म्यानेजरमा शंकर राना र भिडियो एनालिस्टमा कृष्ण भुसाल रहेको क्यानले जनाएको छ । लुम्बिनीले पहिलो खेल उद्घाटनका दिन कोशी प्रदेशसँग सिद्धार्थ रङ्गशालामा खेल्नेछ । प्रतियोगिताको उद्घाटन तिलोत्तमामा रहेको एक्स्ट्राटेक ओवल क्रिकेट मैदानमा आइतवार सुरु हुँदैछ । प्रतियोगिताका सबै पहिलो पटक काठमाडौं बाहिर लुम्बिनी प्रदेशका दुई जिल्लामा हुनेछन् ।