प्रधानमन्त्री कप क्रिकेट प्रतियोगितामा कर्णालीको विजयी सुरुवात
दाङ, २५ फागुन । प्रधानमन्त्री कप एकदिवसीय पुरुष राष्ट्रिय क्रिकेट प्रतियोगिता अन्तरगत आईतबार लमहीमा भएको पहिलो खेलमा कर्णाली प्रदेशले प्रभावशाली जित हासिल गरेको छ । नेपाल क्रिकेट संघको आयोजना तथा दाङ जिल्ला क्रिकेट संघको व्यवस्थापन एवम् लुम्बिनी प्रदेश क्रिकेट संघको समन्वयमा शुरु भएको प्रतियोगिताको पहिलो खेलमा कर्णाली प्रदेशले सुदुरपश्चिम प्रदेशलाई ७९ रनले हराउँदै विजयी शुरुवात गरेको हो ।
कर्णालीका दीपेन्द्र रावतले उत्कृष्ट प्रदर्शन गर्दै ९ ओभरमा ३ मेडनसहित ३३ रन खर्चेर महत्वपूर्ण ७ विकेट लिएपछि सुदूरपश्चिम प्रदेशले सामान्य लक्ष्य पनि पूरा गर्न सकेन । १ सय ५६ रनको विजयी लक्ष्य पछ्याएको सुदुरपश्चिम प्रदेश २१ ओभरमै सवै विकेट गुमाउदै केवल ७६ रनमा समेटिएपछि कर्णालीले प्रभावशाली जीत निकाल्यो ।
लमहीस्थित देउखुरी अन्तर्राष्ट्रिय क्रिकेट रंगशालामा टस जितेर पहिले ब्याटिङ गरेको कर्णाली प्रदेशले अर्जुन घर्तीको ७१ रनको योगदानमा १ सय ५५ रन बनायो । यसैगरी, दिनेश अधिकारीले १७ रन, दीवान पुनले १२ रनको योगदान दिनुभयो । ४० दशमलव ३ ओभरमा १ सय ५५ रनमा समेट्न सुदूरपश्चिमका हेमन्त धामीले महत्वपूर्ण ४ विकेट लिनुभयो ।
यसैगरी, नारायण जोशीले २ विकेट लिँदा शेर मल्ल, मिलन बोहरा, भोजराज भट्टले समान १–१ विकेट लिनुभयो । १ सय ५६ रनको विजयी लक्ष्य पछ्याएको सुदूरपश्चिम प्रदेशले पहिलो ५ ओभर विना विकेटको क्षतिमा ३० रन बनाएर राम्रो शुरुवात गरेपनि त्यसपछि विकेट पतन नरोकिँदा हार व्यहोर्याे । सुदुरपश्चिमका कुनै पनि ब्याटर क्रिजमा टिक्न नसक्दा नाटकीय रुपमा हार व्यहोर्यो । सुदूरपश्चिमलाई ७६ रनमा समेट्न कर्णालीका दीपेन्द्र रावतले महत्वपूर्ण ७ विकेट र दीवान पुनले २ विकेट लिनुभयो ।
सुदूरपश्चिमका लागि खडक बोहोराले २७ रन, किरण ठगुन्ना र शेर मल्लले समान १३÷१३ रन बनाउनु बाहेक सुदूरपश्चिमका अरु खेलाडीले सम्झन लायक प्रदर्शन गर्न सकेनन् । कर्णालीलाई महत्वपूर्ण जीत दिलाउन ७ विकेट लिएका दीपेन्द्र रावत प्लेयर अफ द म्याच हुनुभयो । प्रतियोगिता अन्तरगत अब सोमबार गण्डकी प्रदेश र सुदूरपश्चिम प्रदेश बीच खेल हुनेछ ।
दाङसहितमा रुपन्देहीको सिद्धार्थ क्रिकेट रंगशाला र एक्स्ट्राटेक ओभल मैदानमा एकैसाथ शुरु भएको प्रतियोगिता आगामी चैत १६ गतेसम्म चल्नेछ । ३ विभागीयसहित सात प्रदेश टीम सहभागी प्रतियोगिताका खेलहरु राउण्ड रोविनका आधारमा हुनेछन् ।
यसैबीच लुम्बिनी प्रदेशका मुख्यमन्त्री चेतनारायण आचार्यले प्रतियोगिताको उद्घाटन गर्नु भएको छ । देउखुरी अन्तर्राष्ट्रिय क्रिकेट मैदानमा शुरु भएको प्रतियोगिताको लुम्बिनी प्रदेशका मुख्यमन्त्री चेतनारायण आचार्यले ब्याटिङ र क्रिकेट संघका अध्यक्ष चतुरबहादुर चन्दले बलिङ गरेर प्रतियोगिताको शुभारम्भ गर्नु भएको थियो ।
देउखुरी अन्तर्राष्ट्रिय क्रिकेट मैदानमा प्रतियोगिताको शुभारम्भ गर्दै मुख्यमन्त्री आचार्यले खेल पर्यटनले मुलुकको समृद्धि र विकासमा महत्वपूर्ण योगदान पुर्याउने बताउनु भयो । खेल क्षेत्रको पूर्वाधार विकास, खेलाडीको क्षमता अभिवृद्धि र नयाँ खेलाडी उत्पादनका लागि सरकारले विशेष ध्यान दिएको उहाँको भनाइ छ । क्रिकेट संघका अध्यक्ष चतुरबहादुर चन्दले काठमाडौं बाहिर पहिलोपटक लुम्बिनी प्रदेशमा प्रधानमन्त्री कप क्रिकेट प्रतियोगिता आयोजना गरेर नयाँ इतिहास रचिएको बताउनु भयो ।