गण्डकी प्रदेशलाई ६ विकेटले हराउँदै सुदूरपश्चिम विजयी
दाङ, २६ फागुन । किरण ठगुन्नाको शतक प्रेरित अविजित १ सय २१ रन बनाएपछि सुदूरपश्चिम प्रदेशले गण्डकी प्रदेश विरुद्ध ६ विकेटको सहज जीत हासिल गरेको छ । प्रधानमन्त्री कप पुरुष एक दिवसीय क्रिकेट प्रतियोगिता अन्तरगत आज लमहीस्थित देउखुरी अन्तर्राष्ट्रिय क्रिकेट रंगशालामा सुदूरपश्चिम प्रदेशले पाएको २ सय २१ रनको लक्ष्य ४३ ओभरमा ४ विकेटको क्षतिमा पूरा गर्यो ।
सुदूरपश्चिमका लागि किरण ठगुन्नाले विष्फोटक पारी खेल्दै १ सय १ बलमा ६ छक्का र ९ चौकाको मद्दतमा १ सय २१ रन बनाउँदा नारायण जोशीले ३८ रनको अविजित योगदान दिए । जारी प्रतियोगितामा किरण ठगुन्ना शतक बनाउने पहिलो खेलाडी बनेका छन् ।यसैगरी, सुदूरपश्चिमका लागि खडक बोहराले १९ रन, निश्चल क्षेत्रीले १८ रनको योगदान दिनुभयो । गण्डकी प्रदेशका विपिन खत्री, अमृत गुरुङ, कमल परियार र अर्जुन कुमालले समान १–१ विकेट लिए ।
यसअघि, टस जितेर पहिले व्याटिङ गरेको गण्डक प्रदेशले आठ विकेटको क्षतिमा २ सय २० रन बनायो । गण्डकी प्रदेशका लागि दीपक डुम्रे र अर्जुन कुमालले अर्धशतकीय पारी खेले । दीपक डुम्रेले ६० रन, अर्जुन कुमालले ५७ रन, सुदीप अर्यालले २३ रन, वंश क्षेत्रीले १८ रन, दिनेश बुढा मगरले १५ रन, अमृत गुरुङ र विपिन खत्रीले समान १०–१० रनको योगदान दिए ।
सुदूरपश्चिमका तर्फबाट कप्तान शेर मल्लले ३ विकेट, नारायण जोशीले २ विकेट, हेमन्त धामी, मिलन बोहरा र अर्जुन बिकले समान १–१ विकेट लिए । गण्डकी प्रदेशसँगको जीतसँगै सुदूरपश्चिम प्रदेशले २ अंक जोड्दै अंक तालिकाको छैठौँ स्थानमा छ । किरण ठगुन्ना आजको प्लेयर अफ़ म्याच भए । ठगुन्नालाई लुम्बिनी प्रदेश क्रिकेट संघ सचिव कैलाश रोका मगर एवम् सिद्धार्थ बैंकका मेनेजरले पुरस्कार प्रदान गरे ।
यसअघि, हिजो भएको पहिलो खेलमा सुदूरपश्चिम प्रदेश कर्णाली प्रदेशसँग नाटकीय रुपमा ७९ रनको हार व्यहोर्दै पराजित भएको थियो । अब भोलि कर्णाली प्रदेश र गण्डकी प्रदेश बीच खेल हुने तालिका रहेको छ ।
नेपाल क्रिकेट संघ क्यानको आयोजना, प्रदेश क्रिकेट संघको समन्वय तथा दाङ क्रिकेट संघको व्यवस्थापनमा जारी प्रतियोगितामा ३ विभागीयसहित सात प्रदेशका टीम सहभागी छन् । दाङसहितमा रुपन्देहीको सिद्धार्थ क्रिकेट रंगशाला र एक्स्ट्राटेक ओभल मैदानमा एकैसाथ शुरु भएको प्रतियोगिताका खेलहरु राउण्ड रोविनका आधारमा भईरहेका छन् । हरेक टीमले एक अर्को टीमसँग खेल्नेछन् । आगामी चैत १६ गतेसम्म चल्ने प्रतियोगिता अन्तरगत दाङमा १४ वटा खेल हुने तालिका रहेको छ ।