दाङमा २९ किलो चरेससहित तीन जना पक्राउ
घोराही, २६ फागुन । दाङमा प्रहरीले २९ किलो बढी लागुऔषध चरेसहित तीन जनालाई पक्राउ गरेको छ ।
लागुऔषध नियन्त्रण ब्युरो शाखा कार्यालय नेपालगञ्ज बाँके तथा जिल्ला प्रहरी कार्यालय दाङको संयुक्त टोलीले सोमवार साँझ आलु राखेको बोराभित्र लुकाएर चरेस ओसारपसार गर्न लागेको अवस्थामा २९ किलो ६९५ ग्रामसहित तीन जनालाई पक्राउ गरेको हो ।
घोराही–होलेरी सडकखण्डअन्तर्गत घोराही उपमहानगरपालिका–१३ बाह्रकुने दह नजिकैबाट ठुलो परिमाणको लागुऔषध चरेससहित तीन जनालाई पक्राउ गरेको जिल्ला प्रहरी कार्यालय दाङले जनाएको छ । गोप्य सूचनाका आधारमा खटिएको प्रहरी टोलीले आलु राखेको बोराभित्र लुकाएर चरेस ओसारपसार गर्न लागेको अवस्थामा तीन जनालाई नियन्त्रणमा लिएको जिल्ला प्रहरी कार्यालय दाङका सूचना अधिकारी एवं प्रहरी नायव उपरीक्षक चक्रबहादुर शाहले जानकारी दिनुभएको छ ।
प्रहरी नायव उपरीक्षक शाहका अनुसार पक्राउ पर्नेमा रुकुम पूर्व जिल्ला भुमे गाउँपालिका–२, खावाङ निवासी ४४ बर्षीय फर्कबहादुर घर्ती, सोही ठाउँ निवासी ५३ बर्षीय रुपधन घर्ती र सोही ठाउँ निवासी ६४ बर्षीय जुनबहादुर पुन रहेका छन् । प्रहरी नायव उपरीक्षक शाहका अनुसार फर्कबहादुर घर्तीको साथबाट १५ किलो १२३ ग्राम र रुपधन घर्तीको साथबाट १४ किलो ५७२ ग्राम चरेश प्रहरीले नियन्त्रणमा लिएको छ ।
पक्राउ परेका तीनै जनालाई लागुऔषध ओसारपसार तथा कारोबार सम्बन्धी अभियोगमा कानुनी प्रक्रिया अघि बढाएर थप अनुसन्धान भइरहेको प्रहरी नायव उपरीक्षक शाहले जानकारी दिनुभएको छ ।