विपदमा खोज र उद्धारसम्बन्धी नमुना अभ्यास
दाङ, २८ फागुन । घोराहीमा विपत् उद्धारसम्बन्धी नमुना अभ्यास गरिएको छ । घोराही उपमहानगरपालिका–१ र २ वडा अन्तर्गत पर्ने रामपुर स्थित चेपे दहमा सोमवार पानीजन्य क्षेत्रमा आइपर्ने विपत् व्यवस्थापन, खोज तथा उद्धारसम्बन्धी नमुना अभ्यास गरिएको होे ।
बर्सातको समयमा खोला, नदी, तलाउ, पोखरी, जलाशय, बाढी, पहिरोमा परेका मानिसको कसरी खोजी गर्ने, त्यसपछि उद्धार गरेर अस्पताल पु¥याउने भनेर नागरिकलाई जानकारी दिने उद्देश्यले नमुना अभ्यास गरिएको सशस्त्र प्रहरी बल नेपाल २९ नम्बर ज्वालामाई गण भालुबाङका प्रहरी निरीक्षक प्रशान्त सागर विष्टले बताए । उनका अनुसार पूर्व अभ्यासका क्रममा बाढी, डुबानमा परेको समयमा स्थानीय स्रोतका रूपमा रहेका प्लास्टिकका बोतल र बोरा, गाडीको ट्युब, म्याटलगायतका सामग्रीको प्रयोग गरेर कसरी बच्न सकिन्छ भनेर जलाशयमा नमुना अभ्यास गरिएको थियो ।
त्यसक्रममा सशस्त्र प्रहरीको टोलीले स्थानीय स्रोत साधनका रूपमा रहेका प्लास्टिकका बोतल र बोरा, गाडीको ट्युब, म्याटको प्रयोग गरेर पौडने, जलाशयमा पौड्दा डुबेको र मृतकलाई कसरी उद्धार गर्नेसँगै उद्धारपछि गरिने प्राथमिक उपचारलगायतका बारेमा नेपाली सेना र नेपाल प्रहरीले पूर्वाभ्यास गरेर नागरिकलाई सचेत बनाउने काम गरेका थिए । नेपाली सेनाको रणसिंह दल घोराही, सशस्त्र प्रहरी बल नेपाल नम्बर २९ गण हेडक्वाटर ज्वालामाई गण भालुबाङ, जिल्ला प्रहरी कार्यालय दाङ र नेपाल रेडक्रस सोसाइटी घोराही उपशाखाको सहकार्यमा विपत् व्यवस्थापनसम्बन्धी खोज तथा उद्धारको नमुना अभ्यास गरिएको हो ।
कार्यक्रममा नगर प्रमुख नरुलाल चौधरीले विपत् व्यवस्थापनका लागि सरोकारवाला निकायको सहकार्य र राज्यका निकायहरूमा दक्ष जनशक्तिसँगै स्रोतसाधनयुक्त बनाउन आवश्यक रहेको बताएका थिए । कुनै पनि विपत्बाट हुने क्षतिलाई कम गर्न संघ, प्रदेश र स्थानीय सरकारले आवश्यक स्रोतसाधन र दक्ष जनशक्तिलाई मौसम अनुसार तयारी अवस्थामा राख्नुपर्ने भन्दै नगर प्रमुख चौधरीले भने, ‘सकभर विपत् आउन नदिन सावधानी अपनाउनु पर्छ र रोकथाममा लगानीसँगै सचेतनाका कार्यक्रमलाई स्थानीय सरकारले सुरक्षा निकायसँगको समन्वयमा प्रभावकारी ढङ्गले गर्दै आएको छ ।’
कार्यक्रममा नगर उपप्रमुख हुमाकुमारी डिसीले विपत्लाई साझा प्रयास र कार्यबाट मात्रै व्यवस्थापन गर्न सकिने बताइन् । कुनै पनि विपत्को उचित व्यवस्थापन गर्न स्थानीय सरकारले आवश्यक स्रोतसाधन र जनशक्ति व्यवस्थापनमा सुरक्षा निकायसँग सदैव समन्वय, सहकार्य गर्दै आएको बताएकी थिइन् । कार्यक्रममा सशस्त्र प्रहरी बल नेपाल नं. २९ गण हेडक्वाटर ज्वालामाई गण भालुबाङका गणपति प्रहरी उपरीक्षक मनोजकुमार धिताल, रणसिंह दल गणका सेनानी सुचित्रा थापा, घोराही उपमहानगरपालिकाका निमित्त प्रमुख प्रशासकीय अधिकृत बासुदेव आचार्य, नेपाल पत्रकार महासंघ दाङका अध्यक्ष सन्तोष सुवेदीलगायतले विपत् व्यवस्थापन, खोज तथा उद्धारका विषयमा एकीकृत प्रयासले नै जनधनको क्षतिलाई न्यूनीकरण गर्न सकिने बताएका थिए ।
विपत् व्यवस्थापनमा सबैको साझा प्रयास र सहकार्य हुनुपर्नेमा जोड दिनुपर्ने बताएका थिए । नगर प्रमुख नरुलाल चौधरीको अध्यक्षतामा भएको कार्यक्रममा वातावरण तथा विपत् व्यवस्थापन समितिका संयोजक भानसिं बुढाको स्वागत मन्तव्यबाट सुरु भएको कार्यक्रमको सहजीकरण महाशाखाका अधिकृत मदनकुमार वलीले गरेका थिए । कार्यक्रममा सुरक्षा निकायसँगै जनप्रतिनिधि, राजनीतिक दलका प्रतिनिधि, स्थानीय, सञ्चारकर्मीलगायतको सहभागिता रहेको थियो ।