पिएम कपमा उत्कृष्ट प्रदर्शन गर्ने ३ खेलाडीलाई मोटरसाईकल पुरस्कार
घोराही, २७ फागुन । नेपाल टेलिकम प्रधानमन्त्री कप पुरुष राष्ट्रिय क्रिकेट प्रतियोगिता २०८१ मा विधागत उत्कृष्ट खेल प्रदर्शन गर्ने ३ जना खेलाडीले पल्सर मोटरसाईकल पाउने भएका छन् ।
पिएम कपमा सहभागी ३ डर्बी विभागीय टीमसहित सात प्रदेशबाट खेलिरहेका खेलाडी मध्येबाट विधागत उत्कृष्ट खेल प्रदर्शन गर्ने ३ जनाले बजाजको पल्सर एनएस २०० पुरस्कार पाउने नेपाल क्रिकेट संघका केन्द्रीय सदस्य प्रदिप मजगैँयाले जानकारी दिनुभयो ।
उहाँका अनुसार, प्रतियोगिताको उत्कृष्ट खेलाडी, सर्वाधिक रन बनाउने खेलाडी र सर्वाधिक विकेट लिने खेलाडीले पल्सर एनएस २०० पुरस्कार पाउने भएका हुन् ।
नेपाल क्रिकेट संघ क्यानको आयोजना, प्रदेश क्रिकेट संघको समन्वय तथा दाङ क्रिकेट संघको व्यवस्थापनमा दाङसहितमा रुपन्देहीको सिद्धार्थ क्रिकेट रंगशाला र एक्स्ट्राटेक ओभल मैदानमा एकैसाथ फागुन २५ गतेदेखि प्रतियोगिता भईरहेको छ ।
प्रतियोगिताका खेलहरु राउण्ड रोविनका आधारमा भईरहेका छन् । हरेक टीमले एक अर्को टीमसँग खेल्ने हुँदा हरेक टीम ३ वटै खेल मैदानमा खेल्नेछन् ।
आगामी चैत १६ गतेसम्म चल्ने प्रतियोगितामा राष्ट्रिय टोलीमा सहभागी खेलाडीदेखि ईमर्जिङ खेलाडी जिल्ला हुँदै प्रदेश र विभागीय टीमबाट खेलिरहेका छन् । ३ वटै खेल मैदानमा प्रतियोगिताका कुल ४६ खेल हुने गरि तालिका बनाईएको छ।