मुख्यमन्त्री कप महिला भलिबलको सेमिफाईनल खेल्ने चार टीमकाे टुङ्गाे
घोराही, २२ चैत । दाङको घोराहीमा जारी मुख्यमन्त्री कप प्रदेश स्तरीय महिला भलिबल प्रतियोगिताको सेमिफाइनल समिकरण पूरा भएको छ । प्रदेश खेलकुद परिषद, लुम्बिनीको आयोजनामा जारी भएको प्रदेश स्तरीय प्रतियोगिता अन्तरगत शुक्रबार क्वाटरफाइनलका खेल सकिएसँगै अन्तिम चारमा पुग्ने टोलीको टुंगो लागेको हो । घोराही उपमहानगरपालिका वडा नम्बर १५ स्थित जिल्ला समन्वय समितिको सहिद मञ्चमा फागुन २० गतेदेखि जारी प्रतियोगिता अन्तरगत क्वाटरफाईनलमा जीत निकाल्दै रुपन्देही, बाँके, रोल्पा र पाल्पा सेमिफाईनल प्रवेश गरेका छन् ।
पहिलो क्वाटरफाइनलमा कपिलवस्तुलाई ३–० को सोझो सेटमा हराउँदै रोल्पा सेमिफाइनल पुगेको हो । ३–० को जीत निकाल्न रोल्पाले २५–१७, २५–२०, २५–१८ को सेट खेल्यो ।
यसैगरी, दोस्रो क्वाटरफाइनलमा दाङलाई ३–० को सोझो सेटमा हराउँदै रोल्पा सेमिफाइनल पुगेको हो । ३–० को जीत निकाल्न पाल्पाले २५–१५, २५–१५ र २५–१८ को सोझो सेटमा दाङलाई हरायो । जीतसँगै पाल्पाले सेमिफाइनलमा रोल्पासँगको भेट पक्का गरेको छ ।
तेस्रो क्वाटरफाइनलमा रुकुमपूर्वलाई ३–२ को सेटमा हराउँदै बाँके सेमिफाइनलमा पुगेको हो । निकै प्रतिष्पर्धात्मक खेलमा बाँकले अन्तिम सेटमा नतिजा आफ्नो पक्षमा पार्दै अन्तिम चारमा स्थान सुरक्षित गरेकोे हो । बाँकेले २–० सेटको अग्रता बनाएको अवस्थामा रुकुमपूर्वले त्यसपछिका दुई सेट जित्दै खेल बराबरीमा पुर्याएको थियो । अन्तिम सेटमा बाँकेले नतिजा आफ्नो पक्षमा पार्याे । बाँकेले २५–२२, २५–१८, २२–२५, २०–२५ र १५–११ को सेटमा रुकुमपूर्वलाई हरायो ।
यसैगरी, क्वाटरफाईनलको अन्तिम खेलमा अर्घाखाँचीलाई ३–० को सोझो सेटमा हराउँदै रुपन्देही सेमिफाइनलमा पुगेको छ । रुपन्देहीले २५–१६, २५–८ र २५–२० को सोझो सेटमा अर्घाखाँचीलाई हरायो । जीतसँगै रुपन्देहीले सेमिफाइनलमा अब बाँकेसँगको भेट पक्का गरेको छ ।
क्वाटरफाईनलका खेलमा हार व्यहोरेसँगै सकिएसँगै रुकुमपूर्व, अर्घाखाँची, कपिलबस्तु र दाङ बाहिरिएका छन् ।
लुम्बिनी प्रदेशका १२ वटै जिल्लाबाट मुख्यमन्त्री कप प्रदेशस्तरीय महिला भलिबल प्रतियोगितामा महिला भलिबल खेलाडी सहभागी भएका प्रदेश खेलकुद परिषदका सदस्य सचिव तिरन गौतमले जानकारी दिनुभयो । प्रदेशमा दक्ष महिला खेलाडी उत्पादन गर्न र भलिबलको विकासका लागि प्रदेश स्तरीय प्रतियोगिता आयोजना गरिएको प्रदेश खेलकुद परिषद, लुम्बिनीले जनाएको छ । प्रतियोगिताको सेमिफाइनल र फाईनल खेल शनिबार हुने आयोजक प्रदेश खेलकुद परिषद लुम्बिनीले जनाएको छ ।
प्रतियोगिताको उपाधि जित्ने टीमले नगद एक लाख, मेडल, ट्रफी र प्रमाण–पत्र पुरस्कार पाउने छ भने उपविजेता टीमले नगद पैसट्टी हजार, मेडल, ट्रफी र प्रमाण–पत्र पुरस्कार पाउने आयोजक प्रदेश खेलकुद परिषदका सदस्य कैलाश रोका मगरले बताउनुभयो । यसैगरी, तृतीय पुरस्कार नगद पैतिस हजार, मेडल, ट्रफी र प्रमाण–पत्र र सान्त्वना हुने टीमले नगद पन्ध्र हजार प्रमाण–पत्र प्राप्त गर्ने उहाँले बताउनुभयो ।
प्रतियोगितामा सर्वोत्कृष्ट खेलाडीलाई नगद दश हजार, मेडल, ट्रफी र प्रमाण–पत्र प्रदान गरिनुका साथै ६ विधामा उत्कृष्ट हुने खेलाडीलाई पनि जनही पाँच हजार, मेडल, ट्रफी र प्रमाण–पत्र प्रदान गरिने उहाँले बताउनुभयो ।