युवा दिवसमा गुञ्जियो युवाका आवाज र विचार
छबि पुरी
घोराही, २७ साउन । सँधैजसो नेताहरुका लामो भाषणमा समय बित्ने औपचारिक कार्यक्रम भन्दा केही पृथक तर गहिरो भावनाले भरिएको कार्यक्रम मंगलबार दाङमा सम्पन्न भएको छ । जहाँ युवा पुस्ताले आफ्ना विचार, अनुभव र दृष्टिकोण खुलस्त राख्दै आफूले देखेका र भोगेका समाजको यथार्थतालाई राज्यले कसरी सम्बोधन गरिरहेको छ भन्ने विषयमा खुला रुपमा विचार र धारणा उजागर गरेका छन् ।
“दिगो विकास र सुनौलो भविष्यको सारः स्थानीय युवाको सहभागिता समृद्धिको आधार” भन्ने नाराका साथ आयोजित उक्त कार्यक्रम अन्तर्राष्ट्रिय युवा दिवस–२०२५ को अवसरमा भएको कार्यक्रममा युवापुस्ताका आवाज कार्यक्रममा गुञ्जियो ।
नेपाल परिवार नियोजन संघ, दाङ शाखाको आयोजनामा तथा घोराही उपमहानगरपालिका र नयाँ पाइला पुनःस्थापना केन्द्र, बिजौरीको सहआयोजनामा भएको कार्यक्रममा १ सय ५० भन्दा बढी युवा विद्यार्थीले निकै रुचीपूर्वक कार्यक्रमको लाभ उठाएका छन् ।
सहभागी युवाहरुले नेपाल सरकारले युवाको विकासका लागि नीति–नियम र योजना बनाएपनि त्यसलाई व्यवहारमा उतार्ने प्रक्रिया कमजोर रहेको तर्क गरेका छन् । नीतिगत प्रतिवद्धता कागजमै सीमित रहँदा युवाले आफ्नो क्षमता र सम्भावनालाई पूर्ण रूपमा उपयोग गर्ने वातावरण पाउन नसकिरहेको उनीहरुको भनाई छ ।
नेपाल परिवार नियोजन संघ दाङका सभापति भरतराज देवकोटाको अध्यक्षता र संघका निवर्तमान केन्द्रीय उपाध्यक्ष निर्मला गौतम रेग्मीको प्रमुख आतिथ्यमा भएको कार्यक्रममा राप्ती स्वास्थ्य विज्ञान प्रतिष्ठानमा अध्ययनरत मार्था गहतराजले नेपालमा युवाका लागि प्रभावकारी रूपमा काम गर्ने वातावरण अझै निर्माण नभएको बताउनुभयो । उहाँले दिगो विकासमा युवाको सहभागिता सुनिश्चित गर्नका लागि अवसर, स्रोत र पूर्वाधारको पहुँच सबै युवासम्म पुग्नुपर्नेमा जोड दिनुभयो ।
पद्मोदय पब्लिक नमूना माध्यमिक विद्यालयका विद्यार्थी सेजन भण्डारी र सुदनकुमार बिकले वृहत यौनिकता शिक्षा र युवाका सवालमा अझै धेरै काम गर्न बाँकी रहेको उल्लेख गर्नुभयो । उनीहरुका अनुसार यौनिकता शिक्षा अझै पनि धेरै क्षेत्रमा संवेदनशील विषय मानिन्छ । जसका कारण आवश्यक जानकारी र चेतना युवासम्म समयमै पुग्न सकिरहेको छैन ।
पद्मोदय क्याम्पसका विकासराज सेनले शिक्षासँगै दक्षता विकासमा जोड दिनुपर्ने बताउनुभयो । उहाँले भन्नुभयो ‘यदि शिक्षासँगै सीप र दक्षता विकास भए रोजगारीका लागि विदेशतिर भौतारिनु पर्ने अवस्था हट्न सक्छ । म आफै शिक्षासँगै आफुले रची राखेको विषयमा काम गरेर स्थापित हुने प्रयासमा छु ।’
माउन्ट भ्यु कलेजकी स्वेच्छा योगीले शिक्षालाई व्यवहारिक बनाउन आवश्यक कदम चाल्नुपर्ने धारणा राख्नुभयो । उहाँले अहिले युवाका लागि भन्ने भन्दा पनि युवाका लागि गर्ने बेला आएको बताउनुभयो ।
त्यसैगरी, माउन्ट भ्युका शशांक पोख्रेलले युवालाई सही बाटोमा डोर्याउन अभिभावक, विद्यालय र समुदायको भूमिका महत्त्वपूर्ण रहने बताउनुभयो । उहाँले भविष्यप्रति सबैलाई चिन्ता हुने भएपनि सही सोच र नीति बनाएर युवामैत्री राज्यको निर्माण गर्नुपर्नेमा जोड दिनुभयो । युवाका लागि केवल भाषणमा हैन अब काम गरेर देखाउने बेला आएको पनि बताउनुभयो ।
माध्यमिक विद्यालय रझेनाका कृष्णा केसी र सुजन केसीले युवाका आवाजलाई राज्यले सुनेर र प्रभावकारी रूपमा सम्बोधन गर्नुपर्ने आवश्यकता औंल्याउनुभयो । ‘जबसम्म युवाका लागि आफ्नै देशमा केही गर्ने वातावरण बन्दैन, तबसम्म देशले अपेक्षित विकास गर्न सक्दैन’, उहाँको भनाई थियो ।
कार्यक्रमका क्रममा नेपाल परिवार नियोजन संघ दाङ शाखाका प्रबन्धक बसन्त खनालले वृहत यौनिकता शिक्षा र युवाका सवालबारे अभिमुखीकरण गर्नुभयो । उहाँले युवालाई स्वस्थ जीवनशैली, यौनजन्य रोगको रोकथाम र प्रजनन स्वास्थ्यका विषयमा स्पष्ट र वैज्ञानिक जानकारी आवश्यक भएको बताउनुभयो ।
नयाँ पाइला पुनःस्थापना केन्द्र बिजौरीका काउन्सिलर शैलेश शर्माले लागुऔषधको दुष्परिणाम र सचेतना प्रदान गर्नुभयो । उहाँका अनुसार युवावस्थामा गलत समूह र नकारात्मक प्रभावमा पर्ने सम्भावना बढी हुने भएकाले परिवार, विद्यालय र समाजले निरन्तर संवाद र मार्गदर्शन गर्नुपर्ने बताउनुभयो । पछिल्लो तथ्यांकले लागुऔषध दुव्र्यसनमा १ लाख ३० हजार ४ सय २४ जना युवाहरु फसेको हुँदा यसलाई रोक्न युवा सचेतना नै महत्वपूर्ण हुने बताउनुभयो ।
कार्यक्रममा सहभागी सबै युवाको विचार र सुझावलाई सम्बद्ध निकायसम्म पुर्याउँदै बनेको नीति नियम सही रुपमा कार्यान्वयन गर्न सहजीकरण गर्ने बताइएको छ । युवालाई राष्ट्रको विकासको मुख्य आधार मान्दै दिगो विकासका एजेन्डामा युवाको सहभागिता सुनिश्चित गर्न सरकारले नीति मात्र होइन, त्यसको प्रभावकारी कार्यान्वयन पनि गर्नतर्फ अग्रसर हुनुपर्ने प्रमुख अतिथि रेग्मीले बताउनुभयो ।
उहाँले सरकार, स्थानीय तह, संघ संस्था र नागरिक समाज सबैले मिलेर युवाका लागि रोजगारी, सीप विकास, व्यवहारिक शिक्षा, स्वास्थ्य सुविधा र सकारात्मक जीवनशैली प्रवद्र्धन गर्नुपर्नेमा जोड दिनुभयो ।
युवाले देखाएका दृष्टिकोण र सुझाव व्यवहारमा उतार्न सके दिगो विकास र सुनौलो भविष्यको सपना साकार पार्न धेरै समय कुर्नु नपर्ने उहाँको भनाई थियो । कार्यक्रमको सहजीकरण नेपाल परिवार नियोजन संघ दाङ शाखाकी कोषाध्यक्ष माया पोख्रेलले गर्नुभएको थियो ।