नयाँ घर पाएपछि दुर्गाको मुहारमा छायो खुशी
घोराही, २७ साउन । राजपुर गाउँपालिका वडा नम्बर ६ गंगदीकी ३० वर्षीया दुर्गा चौधरीको नाममा हिजोका दिनसम्म १ धुर पनि जमिन थिएन । धामपानी बाट ओत लाग्ने घरको ठेगान थिएन । ३ बालबच्चाको रेखदेख अनि शिक्षा दिक्षा कसरी गर्ने चुनौतिको बीचमा बाँचि रहनुभएकी दुर्गा आफै पनि अपांगता भएको व्यक्ति हुनुहुन्छ । ३० वर्षीया दुर्गालाई कहाली लाग्दो जीवनबाट माथि निस्कने कुनै विकल्प थिएन ।
त्यसैले सिंचाइका लागि बनाइएको सानो टहरोमा ३ छोराछोरीका साथमा विवशताका साथ बस्दै आउनुभएको थियो । घरबास विहिन दुर्गाको अवस्था देख्दा लाग्थ्यो, उहाँले कसरी हिम्मत जुटाएर बाँच्न सक्नुभएको छ ? शरीरले साथ दिन छाडेका बेला बालबच्चाको भविष्य देख्ने हिम्मत हुने कुरै भएन । तर, केही नहुनेको पनि कोही हुन्छन् भने झै दुर्गाका लागि दुख बिसाउने आधार ग्रामीण महिला उत्थान केन्द्र बनेर आयो ।
दुर्गाको अवस्था निकै दयनीय अनि पीडादायी देखेपछि निवास संस्था र ग्रामीण महिला उत्थान केन्द्रको पूर्ण सहयोगमा अपांगतामैत्री घर निर्माण गरि हस्तान्तरण गरिएको छ । उहाँको अवस्था पहिचान गरेर गाउँपालिकाको सिफारिसमा संस्थाको पूर्ण लागतमा अपांगतामैत्री घर निर्माण गरी मंगलबार हस्तान्तरण गरिएको हो । दुर्गालाई ह्वीलचियरमा राखेर गाउँपालिका अध्यक्ष शरद बुढाथोकी, उपाध्यक्ष धनपति यादव, ग्रामीण महिला उत्थान केन्द्रकी अध्यक्ष आसमानी चौधरीले गृह प्रवेश गराउनुभयो । गृह प्रवेश गराउँदै गर्दाको दुश्य निकै कारुणिक अनि मानवताले भरिएको थियोे ।
किनकी दुर्गाको हातखुट्टाले राम्रोसँग काम गर्दैन । अरुको सहारामा बस्नुपर्ने स्थितिबाट गुज्रिरहेको बेला बस्ने बासका लागि सुरक्षित आवास निर्माण गरी हस्तान्तरण गर्न पाउँदा आफुलाई केही भएपनि सामाजिक योगदान गरेको महसुस भएको ग्रामीण महिला उत्थान केन्द्रकी अध्यक्ष आसमानी चौधरीले बताउनुभयो । महिला, बालबालिकाको सशक्तीकरणमा संस्थाले गर्दै आएको कामलाई समाज हीतमा केन्द्रित गरेर असहाय, विपन्न महिलाहरुको उत्थानमा संस्थाले विशेष प्राथमिकता दिएर सामाजिक काम गर्दै आएको बताउनुभयो ।
दुई कोठा सुत्ने कोठा, एउटा सौचालय र पसल गर्न मिल्ने कोठासहितको भूकम्प प्रतिरोधी घर निर्माण हस्तान्तरण गर्दा दुर्गाको मुहारमा बेग्लै खुशी झल्किरहेको थियो । अहिले उहाँले घर पाउनुभएको छ । घरसँगै जमिनको स्वामित्व पाउनुभएको छ । जेठो छोरा आदित चौधरी ११ वर्षको भए । उनी साधारण नमुना मावि सालभौरीमा कक्षा ६ मा अध्ययनरत छन् भने आकृति चौधरी ९ वर्षकी भईन । उनी रात्रि आधारभूत विद्यालय गंगदीमा कक्षा ४ मा र कान्छो छोरा ६ वर्षीय अमित चौधरी ३ कक्षामा अध्ययन गर्छन् । उनीहरुको पठनपाठन पनि घरमा बसेर सुरक्षित रुपमा हुने भएपछि दुर्गाको परिवारमा अहिले खुशीयाली छाएको छ ।
बैशाख १५ मा शिलान्यास गरिएको घर निर्माण गरी साउन २७ हस्तान्तरण गर्दा गाउँपालिका अध्यक्ष शरद बुढाथोकीले समस्यामा परेकाहरुका लागि गरिएको प्रयासले सार्थकता पाएको बताउनुभयो । उहाँले एकल महिला, १६ वर्ष मुनिका बालबच्चा भएका समस्यामा परेका महिलाहरुका लागि सुरक्षित आवास निर्माण गरी बस्ने बास र केही गर्न सक्ने हिम्मत जुटाउने काममा संस्थाले ठूलो सहयोग गरेको बताउनुभयो ।
उपाध्यक्ष धनपति यादवले कोही पनि महिला दिदीबहिनीहरु बस्नकै लागि तडपिनुपर्ने अवस्थाको अन्त्य गर्न आफुले प्रयास गरिरहेको बताउनुभयो । चराचुरुङ्गीले त साँझ परेपछि बास खोज्दै गुँडमा फर्किन्छ भने मानिसले घर नै नभएर जीवन गुजार्नु पर्दा कस्तो पीडा बोध हुन्छ होला भनेर समस्यामा परेका महिलाहरुका लागि सुरक्षित आवास निर्माण गरेर घरमा बस्ने वातावरण बनाईरहेको बताउनुभयो ।
घर हस्तान्तरणसँगै संस्थाले दुई–दुई थान सिरक, डसना, म्याट, सिरानी तथा एक थान स्टिल दराज हस्तान्तरण गरेको छ भने घोराहीस्थित प्रकृति फर्निचरबाट मुकेश शर्माले दुई थान खाट सहयोग गर्नुभएको छ । ग्रामीण महिला उत्थान केन्द्र र निवास संस्थाको लागत दुर्गाका लागि बनाईएको घर ६ लाख ६५ हजारमा निर्माण भएको उक्त परियोजनाकी संयोजक पार्वती बस्नेतले बताउनुभयो ।
परियोजनाले पहिलो चरणमा गतर्ष गढवा र राजपुरमा ८ वटा आवास निर्माण गरि लक्षित महिलाहरुलाई हस्तान्तरण गरिसकेको छ । जसबाट २३ जना महिला तथा बालबालिका प्रत्यक्ष लाभान्वित भएका छन् । अब दोस्रो चरण ७ वटा घर निर्माण भईरहेको संस्थाले जनाएको छ । जस अनुसार, राजपुरमा ३ वटा, गढवामा ४ वटा बन्नेछ ।