अल्फाका खेलाडीले थाइल्याण्डमा जिते तीन स्वर्णसहित छ पदक
दाङ, २९ साउन । थाइल्यान्डमा भएको आठौं हिरोज अन्तर्राष्ट्रिय तेक्वान्दोे च्याम्पियनसिपमा अल्फा तेक्वान्दो डोजाङ घोराहीका खेलाडीले तीन स्वर्णसहित छ पदक जितेका छन् ।
आठौँ हिरोज अन्तर्राष्ट्रिय तेक्वान्दोे च्याम्पियनसिपमा नेपालबाट सहभागी भएका अल्फा तेक्वान्दो डोजाङका छ खेलाडीमध्ये वसन्त विष्ट, अस्मिता बुढा र टाइसन विष्टले स्वर्ण पदक जितेका हुन् ।
प्रतियोगितामा उत्कृष्ट खेल प्रदर्शन गरेका अल्फाका खेलाडी वसन्तले फाइनल खेलमा फिलिफिन्स, अस्मिताले थाइल्यान्ड र टाइसनले इन्डोनेसियाका खेलाडीलाई पराजित गर्दै प्रतियोगितामा स्वर्ण पदक जित्न सफल भएका हुन् । यसैगरी प्रतियोगितामा आयुषासिंह ठकुरी र शुभम केसीले रजत तथा निशा पुनले कांस्य पदक जितेका छन् । प्रतियोगिताको सेमिफाइनल खेलमा आयुषा युएस र शुभम थाइल्यान्ड तथा निशा रसियन खेलाडीसँग पराजित भएकी थिइन् ।
प्रतियोगितामा विजेता खेलाडीले मेडल, सर्टिफिकेट र तेक्वान्दो डे«ेस प्राप्त गरेका छन् । हिरोज तेक्वान्दो थाइल्यान्डको आयोजनामा साउन २४ र २५ गते (अगस्ट ९ र १०–२०२५) मा थाइल्यान्डमा भएको प्रतियोगितामा २७ देशका पाँच हजार बढी खेलाडीले भाग लिएका थिए ।
उक्त प्रतियोगितामा अल्फा तेक्वान्दो डोजाङ प्रमुख तथा प्रशिक्षक सुनिता विष्टसमेत अन्तर्राष्ट्रिय रेफ्रीका रूपमा प्रतियोगितामा सहभागी भएकी थिइन् ।