गुरुकुललाई इन्टर स्कुल बास्केटबलको उपाधि
दाङ, ३० साउन । पाँचौँ इन्टर स्कुल बास्केटबल प्रतियोगिता–२०८२ को उपाधि गुरुकुल एकेडेमीले जितेको छ । घोराही–१५ रतनपुरस्थित गुरुकुल एकेडेमीमा बिहिबार भएको प्रतियोगिताको फाइनल खेलमा जनज्योति विद्यामन्दिरको ‘ए’ टिमलाई ६०–४७ को अङ्कमा हराउँदै आयोजक गुरुकुलको ‘ए’ टिमले उपाधि जितेको हो ।
योसँगै गुरुकुलले इन्टर स्कुल बास्केटबल प्रतियोगिता लगातार तेस्रो पटक जितेको छ । गुरुकुलले २०८१ र २०८० सालमा पनि उपाधि जितेको थियो । प्रतियोगिताको विजेता टिम गुरुकुलले ट्रफि, मेडल र प्रमाणपत्र प्राप्त गरेको छ भने उपविजेता बनेको जनज्योति विद्यामन्दिरको टिमले मेडल र प्रमाणपत्र प्राप्त गरेको छ ।
साउन २६ देखि २९ गतेसम्म चार दिन सञ्चालन भएको प्रतियोगितामा उत्कृष्ट खेल प्रदर्शन गर्ने गुरुकुलका खेलाडी एरोन केसी उत्कृष्ट प्लेयर, जनज्योति विद्यामन्दिरका आस्पाक मुलमान इमर्जिङ प्लेयर र ज्ञानसिन्धु एकेडेमीको टिम अनुशासित टिमका रूपमा सम्मानित भएको थियो ।
प्रतियोगिताका विजेता खेलाडीलाई पुरस्कार वितरण गर्दै नेपाल पत्रकार महासंघका निवर्तमान केन्द्रीय अध्यक्ष विपुल पोख्रेलले खेल मानिसको जीवनको अभिन्न अङ्ग भएको बताए । शिक्षा जस्तै हरेक नागरिकको खेलकुद र मनोरञ्जन अभिन्न अङ्ग बनेको भन्दै कार्यक्रमका प्रमुख अतिथि पोख्रेलले बालबालिकाको चौतर्फी विकासका लागि शिक्षासँगै हरेक विद्यालयले खेलकुद र मनोरञ्जनात्मक कार्यमा सहभागी बनाउनुपर्ने बताएका थिए ।
‘शिक्षा सँगसँगै खेलकुद, मनोरञ्जनमा बालबालिकालाई अघि बढाउन घरसँगै विद्यालय तहदेखि नै प्रोत्साहन गर्न आवश्यक छ’, कार्यक्रमलाई सम्बोधन गर्दै पोख्रेलले भने, ‘गुरुकुलले बालबालिकालाई शिक्षासँगै खेलकुद प्रतियोगिता आयोजना गरेर विद्यार्थीलाई खेलकुदमा अघि बढाउने प्रयास गरेको छ । यो प्रशंसनीय छ, यस्ता कार्य अन्य विद्यालयले पनि सिक्न आवश्यक छ ।’
गुरुकुल एकेडेमीका प्रधानाध्यापक डा कृष्णराज डिसीको अध्यक्षतामा भएको कार्यक्रममा दाङ जिल्ला बास्केट बल संघका अध्यक्ष विपिन केसीले खेलकुद क्षेत्रको विकाससँगै नयाँ खेलाडी उत्पादनमा प्रतियोगिताले महत्वपूर्ण भूमिका खेलेको बताए । कार्यक्रमका विशिष्ट अतिथि केसीले खेलले शारीरिक तथा मानसिक रूपमा स्वस्थसँगै अनुशासित नागरिक बनाउन भूमिका खेल्ने भएकाले विद्यालय तहदेखि नै बालबालिकालाई खेलकुदसँग जोड्नुपर्ने बताए ।
शिक्षा, संस्कार र संस्कृतिलाई मुल आधार बनाएर अघि बढेको गुरुकुलले खेलकुदलाई प्राथमिकता दिएर अघि बढ्न राम्रो भएको बताएका थिए । जनज्योति विद्यामन्दिरका संस्थापक बिमलकुमार श्रेष्ठले खेलले शारीरिक तथा मानसिक रूपमा स्वस्थ बनाउनेदेखि विभिन्न विद्यालयमा अध्ययनरत बालबालिकामा मित्रवत भावनाको विकास गर्न भूमिका खेलेको बताए ।
गुरुकुलका विद्यालय संयोजक भुवन आचार्यको स्वागत मन्तव्यबाट सुरु भएको कार्यक्रमको सहजीकरण एकेडेमीका शिक्षक विवेक शर्माले गरेका थिए । विद्यालय तहदेखि बास्केटबल खेलको विकास र नयाँ खेलाडी उत्पादन गर्ने उद्देश्यले आयोजना गरेको प्रतियोगितामा जिल्लाका आठ विद्यालयबाट १४ वटा टिमको सहभागिता रहेको थियो । विद्यार्थीले नृत्य समेत प्रस्तुत गरेका थिए ।