गुलरियामा भएकाे एक महिने शिवपुराण तथा श्रृङ्गारिक महाआरती समापन
घोराही, ३१ साउन । घोराही उपमहानगरपालिका वडा नम्बर १७ गुलरियामा आयोजित एक महिने शिव महापुराण तथा श्रृङ्गारिक महाआरतीमा २१ लाख रुपैयाँ बढी दान संकलन भएको छ ।
शिव महापुराण तथा श्रृङ्गारिक महाआरतीमा दानदाता, भक्तजन, सामाजिक व्यक्ति, संघ संस्था, विद्यालयहरुबाट उक्त रकम संकलन भएको शनिबार समापनका अवसरमा जानकारी गराईएको हो ।
मन्दिर व्यवस्थापन समितिका अध्यक्ष एवम् शिवपुराण तथा श्रृङ्गारिक महाआरती मूल आयोजक समिति संयोजक गोविन्द गोराथोकीको अध्यक्षता तथा घोराही उपमहानगरपालिकाकी उपप्रमुख हुमा डिसीको प्रमुख आतिथ्य एवम् स्थानीय समाजसेवी, दानदाता बसन्ता केसीको विशिष्ट आतिथ्यमा भएको समापन समारोहमा मूल आयोजक समितिका कोषाध्यक्ष दिपकुमार खत्रीले पहिलो पटक आयोजित धार्मिक अनुष्ठान सफलतापूर्वक सम्पन्न हुँदा संकलित रकमबाट व्यवस्थित पार्क निर्माणमा लगानी गरिने बताउनुभयो । आम्दानी र खर्चको बिस्तृत विवरण भने केही दिनमा सार्वजनिक गरिने उहाँले बताउनुभयो ।
समापन समारोहलाई सम्बोधन गर्दै प्रमुख आतिथि डिसीले मन्दिर व्यवस्थापन समितिले ऐतिहासिक कामको शुरुवात गरेर सफलता हासिल गरेको बताउनुभयो । सार्वजनिक सम्पत्तिको संरक्षण र उपयोगमा स्थानीयको भुमिकालाई उजागर गरेर राज्यलाई पनि सकारात्मक दवाव दिने काम गरेको भन्दै कामको प्रशंसा गर्नुभयो ।
घोराही क्षेत्र धार्मिक, सांस्कृतिक, पर्यटकीय, शैक्षिक, सामरिक, प्रशासनिक दृष्टिकोणले निकै महत्वपूर्ण रहेको छ र यसको अधिकतम उपयोगमा ध्यान दिनुपर्ने बेला आएको उहाँले बताउनुभयो । कुरा धेरै गर्ने तर काम थोरै गर्ने परिपाटीले समाज पछि परेको भन्दै सबैले इमान्दारीपूर्वक जिम्मेवारी वहन गरेर समृद्ध समाज बनाउन लाग्नुपर्ने बताउनुभयो ।
‘राम्रो काम गरेको देख्न नसक्नेहरुका कारण हामी पछि परेका छौँ । नकारात्मकता हटाउँदै अब सकारात्मक रुपमा काम गर्न जुट्नुपर्छ’ उहाँले भन्नुभयो ‘स्थानीय कला, संस्कृतिको विकासमा लाग्न गरिएको प्रयासलाई सबैको सहयोग गरौँ । यो निकै राम्रो शुरुवात भएको छ । यसलाई अझ राम्रो बनाउन लाग्नुपर्छ । समुदायको विकासका लागि सबैमिलेर काम गर्नुपर्छ । पार्कको विकासका लागि गुरुयोजना तयार पारेर अघि बढौँ । यसमा मेरो पूरा साथ सहयोग रहनेछ ।’
वडा नम्बर १७ का वडा अध्यक्ष रामलौटन चौधरीले एक महिने शिवपुराण तथा श्रृङ्गारिक महाआरतीले धार्मिक जागरण ल्याउनुका साथै सार्वजनिक सम्पत्तिको संरक्षणमा पनि योगदान पुगेको बताउनुभयो ।
नेपाल पत्रकार महासंघ केन्द्रका सचिव सविन प्रियासनले सार्वजनिक सम्पत्तिको संरक्षण गर्नु सबैको दायित्व रहेकोभन्दै गुलरियामा गरिएको कार्यक्रमले समाजमा सकारात्मक सन्देश दिएको बताउनुभयो ।
कार्यक्रममा गुलरिया ‘क’ टोलका अध्यक्ष सानुनारायण अधिकारी, मूल आयोजक समिति सचिव दीपक वलीलगायतले शुभकामना मन्तव्य व्यक्त गर्नुभएको थियो ।
गुलरिया पार्क राम्रो बनाउने काम सबैको साझा दायित्व र जिम्मेवारी रहेको भन्दै आयोजित धार्मिक अनुष्ठानमा सहभागी भई सफलतापूर्वक सम्पन्न सहयोग गर्नुहुने सबैलाई मूल आयोजक समिति संयोजक गोराथोकीले धन्यवाद व्यक्त गर्नुभएको छ ।
धार्मिक मन्दिर परिसरको सौन्दर्यकरण, सङ्ग्राहालयको स्तरोन्नति, पदमार्ग, विश्राम गृह, बत्ती व्यवस्थापन, पानी सुविधा जस्ता आधारभूत संरचनाको सुधार तथा थप विकासका लागि आयोजित धार्मिक अनुष्ठानबाट संकलित रकमको उपयोग हुने उहाँले बताउनुभयो ।
एक महिने महाआरतीमा विभिन्न ३ सय ८ समुहहरुबाट आरती दीपप्रज्वलन हुँदा ७ लाख बढी बत्ती बलेको उहाँले बताउनुभयो ।
शिव महापुराण तथा श्रृङ्गारिक महाआरतीका प्रमुख कथावाचक सुप्रसिद्ध पण्डित आचार्य श्यामशरण रहनु भएको थियो । मूल आयोजक समिति उपसंयोजक बेचन वलीको स्वागत मन्तव्यबाट शुरु भएको कार्यक्रमको सहजीकरण सचिव कमल वलीले गर्नुभएको थियो ।