पूर्व खेलाडी गुरुङको उपचारका लागि आर्थिक सहयोग
तुलसीपुर, ६ भदौ । प्रशिक्षक तथा खेलाडी सुधीर गुरुङको उपचारका लागि सहयोग सङ्कलन भएको छ ।
बिरामी भई भारतमा उपचार गराइरहेका गुरुङको उपचार सहयोगका लागि नेपाली कांग्रेसका महाधिवेशन प्रतिनिधि बिमल रिजालसहितका सहयोगीले एक लाख १२ हजार रुपैयाँ सहयोग पठाएका छन् । जिल्लाकै पहिलो एकेडमी ‘स्पोट्र्स स्कुल फुटबल एकेडमी’ सञ्चालक समितिका अध्यक्ष तथा प्रशिक्षक गुरुङ ‘प्रोस्टेडको क्यान्सर’ देखिएका कारण उपचाररत छन् ।
खेल क्षेत्रमा समर्पित गुरुङको जीवन रक्षाका लागि तुलसीपुर उद्योग वाणिज्य संघका पूर्वअध्यक्ष समेत रहेका बिमल रिजाल र उनको समूहले आपसमा रकम सङ्कलन गरेर एक लाख १२ हजार रुपैयाँ उपचारका लागि पठाएका हुन् ।
रिजाल सञ्चालक समितिका अध्यक्ष रहेको ‘तुलसीपुर सिटी हस्पिटल’का पदाधिकारी, कार्यरत कर्मचारी, डाक्टर र नर्सबाट सहयोग सङ्कलन भएको ५१ हजार र रिजाल आबद्ध रहेको वल्र्ड ११ फ्रान्ड ग्रपुले ६१ हजार गरी कुल एक लाख १२ हजार रुपैैयाँ सहयोग रकम सङ्कलन भएको थियो ।
सुधीर गुरुङ बचाउ अभियानका लागि आर्थिक सहायता सङ्कलन गरिरहेका फुटबलका प्रशिक्षक प्रीतिबहादुर गिरी (प्रेस)का अनुसार हालसम्म करिब १० लाख रुपैयाँ आर्थिक सहयोग सङ्कलन भएको बताए ।