विद्यालयस्तरीय हाप्किडो राष्ट्रिय प्रतियोगिताको तिब्र तयारी
दाङ,११ मंसिर । दाङको घोराहीमा हुन थालेको चौथो राष्ट्रिय विद्यालयस्तरीय हाप्किडो प्रतियोगिता–२०८२ को तयारीलाई तीव्र पारिएको छ । यहि मंसिर १६ देखि २० गतेसम्म घोराहीस्थित दाङ भ्याली कलेजमा हुन थालेको प्रतियोगिताको प्रचारप्रसारसँगै आवास, भौतिक संरचना, सुरक्षा, प्राविधिक व्यवस्था र स्वयंसेवक परिचालनलगायको व्यवस्थापनका लागि तयारीलाई तीव्र पारिएको हो ।
नेपाल हाप्किडो संघको आयोजना तथा दाङ भ्याली कलेज हाप्किडो डोजाङको सह–आयोजनामा हुन थालेको प्रतियोगिताका लागि आवास, भौतिक संरचना, सुरक्षा, प्राविधिक व्यवस्था र स्वयंसेवक परिचालनसहितको तयारीलाई तीव्र गतिमा अघि बढाइएको छ । प्रतियोगिताको उद्घाटन समारोह मंसिर १७ गते बिहान ११ बजे ट्राफिक चोकबाट ¥याली सुरु हुने प्रतियोगिताका संयोजक बिशाल थापाले जानकारी दिएका छन् । घोराही बजारलाई खेल उत्सवमय वातावरणमा रूपान्तरण गर्ने आयोजकले बताएका छन् । प्रतियोगितामा सहभागीताका लागि एक सय ५४ विद्यालयले खेलाडी दर्ता गराइसकेका छन् ।
प्रतियोगिताका संयोजक थापाका अनुसार पुरुष तथा महिलातर्फ १७–१७ तौल समूहमा खेलाडीले प्रतिस्पर्धा हुनेछ । स्पारिङ, सेल्फ–डिफेन्स, विशेष प्रदर्शन तथा अन्य प्राविधिक विधाहरू स्थापित अन्तर्राष्ट्रिय हाप्किडो महासंघको मापदण्ड अनुसार सञ्चालन गरिनेछन् । साथै ४५ विद्यालय सहभागी हुने टिम डेमोन्स्ट्रेसन सेसन हुनेछ । जहाँ फ्लिप, रियल–फाइट टेक्निक, हतियार प्रदर्शन, सिन्क्रोनाइज्ड मूभमेन्ट र सुरक्षित ब्रेकिङ टेक्निक्सजस्ता कलात्मक प्रस्तुतीहरू देखाइने छ ।
प्रतियोगिता सञ्चालनका लागि म्याट, सुरक्षा कवच, ध्वनि प्रणाली, बोर्ड, रेफ्री प्याड, स्वास्थ्य सहायता कक्ष, फस्र्ट–एड टिम तथा एम्बुलेन्ससहित सम्पूर्ण प्राविधिक र स्वास्थ्य व्यवस्था मिलाइएको छ । खेलाडीहरूका लागि यातायात, खानपान, विश्राम कक्ष तथा सूचना कक्षसमेत अन्तिम चरणमा तयार भइसकेको आयोजकले जनाएको छ । प्रतियोगिताका संयोजक थापाका अनुसार यसपटक विजेताहरूलाई नगद पुरस्कार, ट्रफी, मेडल र प्रमाणपत्र प्रदान गरिनेछ ।
स्थानीय समुदाय, विद्यालय, प्रशिक्षक र अभिभावकमा उच्च उत्साह देखिएको यो प्रतियोगिताले दाङमा पर्यटन, बजार र स्थानीय गतिविधिमा सकारात्मक प्रभाव पार्ने अपेक्षा गरिएको छ ।