कैदी फरार प्रकरण : जेलरसहित असई र हवल्दारविरूद्ध पक्राउ पुर्जी
पुस १२, २०७८
दाङ,१२ पुस । घोराही कारागारका कैदी फरार प्रकरणमा घोराही कारागारका जेलर युवराज परियारसहित अन्य दुई जनाविरूद्ध अदालतले पक्राउ पुर्जी जारी गरेको छ ।
घोराही कारागार प्रशासन र सुरक्षा संयन्त्रको चरम लापरवाहीले कारागारका नाइके समेत रहेका कैदी यमराज परियार भागेको देखिएको भन्दै जेलर युवराज परियार, कारागार सुरक्षा प्रमुख प्रहरी सहायक निरिक्षक रुद्र सेन ठकुरी र प्रहरी हवल्दार गणेशकुमार थारुको नाममा दाङ जिल्ला अदालतले सोमवार पक्राउ पुर्जी जारी गरेको छ ।
कर्तव्य ज्यान मुद्धामा जन्मकैदको सजाय काटिरहेका राजपुर गाउँपालिका–३ बेला निवासी यमराज परियारलाई अस्पताल लग्ने क्रममा मिलोमतोमा भगाएको प्रहरीले निष्कर्ष निकालेको थियो । मिलोमतोमा कैदी भगाउनका लागि जेलर परियार, असई ठकुरी र प्रहरी हबल्दार चौधरीको समेत उक्त घटनामा आशंका देखिएपछि उनीलाई थुनामा राखेर अनुसन्धान गर्नुपर्ने भन्दै तीन जनाविरूद्ध पक्राउ पुर्जी जारी गरिएको जिल्ला प्रहरी कार्यालय दाङले जनाएको छ ।
जेलर परियार आफु बिदामा बसेका बेला कारागारमा उपस्थीत भएर नाइके परियारलाई उपचारका लागि अस्पताल लैजान अनुमति दिएका थिए । बिहीबार बिहान ११ बजेतिर कारागारबाट स्वास्थ्य उपचारका लागि भनेर प्रहरी जवान धनबहादुर चौधरीले आफ्नै मोटरसाइकलमा कारागारका नाइके यमराज परियारलाई उपचार गर्न भनेर बाहिर ल्याएका थिए । तर उनीहरु अस्पताल नगएर घोराही उपमहानगरपालिका–१५ स्थीत थकाली भान्सा घर एण्ड रेष्टुरेण्टमा पुगेका थिए ।
उक्त रेष्टुरेष्टमा दुई युवतीसँग नाइके परियार र प्रहरी जवान चौधरी यौन सम्वन्धमा लागेको अनुसन्धानका क्रममा प्रहरीले फेला पारेको छ । त्यही क्रममा नाइके परियारले प्रहरी जवान चौधरी र युवतीलाई होटेलको कोठामा थुनेर प्रहरीकै मोटेरसाइकलमा भाग्न सफल भएका थिए । कारागारका नाइके परियार फरार घट्नामा प्रहरीले यौन क्रियाकलापमा संलग्न दुई युवतीलाई समेत नियन्त्रणमा लिएर अनुसन्धान गरिरहेको छ । घट्नामा संलग्नहरुलाई नियन्त्रणमा लिएर र थप तीन जनालाई पक्राउ पुर्जी भएको छ ।
परियारले भाग्न प्रयोग गरेको प्रहरी जवान चौधरीको मोटरसाइकल घोराही–लमही सडक खण्डको जंगलमा फेला परेको थियो । आइतवार काराारका जेलर परियारलाई जिल्ला प्रशासनमा तानेर उनको स्थानमा तुलसीपुर कारागारका जेलर अमर वलीलाई पठाइएको थियो ।
